AVROPA MƏHKƏMƏSİ TARİXİ QƏRARINI VERDİ - Ermənistana qarşı iddiaya baxıldı

Bu gün AİHM –nin Böyük Palatası “Çıraqov və başqaları Ermənistana qarşı” şikayət ərizəsi üzrə qərar çıxarıb

Bu gün Avropa İnsan Haqları Məhkəməsinin Böyük Palatası (AİHM) “Çıraqov və başqaları Ermənistana qarşı” şikayət ərizəsi üzrə qərar çıxarıb.APA-nın Strasburqdakı müxbirinin verdiyi xəbərə görə, məhkəmə prosesinə AİHM sədri Din Şpilman sədirlik edib. Azərbaycandan Xanlar Hacıyev, Ermənistandan isə Alvina Gülümyanın da qatıldığı məhkəmədə 17 hakim iştirak edib.

Azərbaycanın Laçın rayonunun bir qrup sakini 1992-ci il mayın 17-də zorla evlərindən qovulduqlarını, onların mülkiyyətini ermənilərin ələ keçdiyi bildirərək, 2005-ci ildə AİHM-ə şikayət ərizəsi ilə müraciət etmişdilər. Strasburq Məhkəməsi on ildən sonra çıxartdığı qərarında şikayətçilərə qarşı Avropa İnsan Haqları Konvensiyasının 1-ci Protokolunun 1-ci maddəsi (mülkiyyətin toxunulmazlığı), Konvensiyanın 8-ci (şəxsi həyatın toxunulmazlığı), 13-cü (ədalətli mühakimə hüququ) maddələrinin davamlı pozulduğunu bildirib.

Şikayətçilərin ərizəsi ilə bağlı məhkəmə Ermənistanın Dağlıq Qarabağ və ona birləşik ərazilərə effektiv nəzarət etdiyini və nəticədə Laçın rayonunun Ermənistan yurisdiksiyası altında olduğunu təsdiq edib.

Strasburq məhkəməsi eyni zamanda şikayətçilərə öz mülkiyyətlərinə sahib olma və ya kompensasiya almalarına icazə verməməyin haqlı olmadığını hesab edib. Sülh danışıqlarının aparılması hökuməti heç də digər tədbirlər görməkdən azad etmir. AİHM şikayətçi və oxşar vəziyyətdə olan digər şəxslərin öz mülkiyyət və kompensasiyalarının bərpa edilməsi üçün bunun asan və əlçatılan iddia mexanizmlərin yaradılmasının vacib olduğunu bildirib.

Bundan başqa, AİHM öz qərarında BMT Təhlükəsizlik Şurasının Dağlıq Qarabağ və Azərbaycanın digər ərazilərinin işğalı ilə bağlı çıxartdığı 4 Qətnaməsini, Avropa Şurası Parlament Assambleyasının 2005-ci ildə qəbul etdiyi 1416 saylı Qətnaməsini, eləcə də Laçın rayonun Ermənistan tərəfindən işğal edilməsi ilə əlaqədar digər beynəlxalq təşkilatların hesabat və qeydlərini də nəzərə alaraq, Dağlıq Qarabağda baş verən insan hüquqlarına görə beynəlxalq hüquqi məsuliyyətin Ermənistan dövlətinin üzərinə düşdüyünü bildirib.

Xatırladaq ki, iddiaçılar Elxan və Adışirin Çıraqovlar (1950 və 1947-ci il təvəllüdlü), Ramiz Cəbrayılov (1960), Akif Həsənov (1959), Fəxrəddin Paşayev (1956) və artıq vəfat etmiş Qara Cəbrayılovdur (1940). Akif Həsənovdan başqa iddiaçıların hamısı hazırda Bakıda yaşayırlar. Laçın rayon sakinləri olan bu şəxslər 1992-ci il mayın 17-də zorla evlərindən qovulub, onların mülkiyyəti ermənilərin əlinə keçib. Adı çəkilən şəxslər iddia ərizələrində bildiriblər ki, Laçına qayıda bilmədiklərinə görə, öz mülkiyyətlərindən istifadə edə bilmirlər. Ermənistan hakimiyyəti isə buna rəğmən onların məruz qaldığı zərərin müqabilində təzminat ödəməyib. İddia ərizəsi Avropa İnsan Haqları Konvensiyasının 1-ci Protokolunun 1-ci maddəsi (mülkiyyətin toxunulmazlığı), Konvensiyanın 8-ci (şəxsi həyatın toxunulmazlığı), 13-cü (ədalətli mühakimə hüququ) maddələrinə əsaslanır. İddiaçılar həmçinin milli ayrı-seçkiliyə (14-cü maddə) məruz qaldıqlarını bildirib və qeyd ediblər ki, əgər erməni və xristian olsaydılar, onları evlərini tərk etməyə məcbur etməzdilər. Bu şikayət ərizəsi Avropa İnsan Haqları Məhkəməsinə 2005-ci il aprelin 6-da daxil olmuşdu. 2010-cu ilin martın 9-da isə iş Məhkəmənin Böyük Palatasına göndərilmiş və həmin ilin 15 sentyabrında Böyük Palata şikayət üzrə ilk məhkəmə prosesini keçirmişdi. 2011-ci ilin dekabrın 14-də AİHM şikayətləri qəbuledilən hesab etmiş və Ermənistanın bu işin AİHM-in müvəqqəti yurisdiksiyasından kənar olduğuna dair etirazını rədd etmişdi. Böyük Palatanın son məhkəmə prosesi 2014-cü ilin 22 yanvar tarixində keçirilmişdi.

Qeyd edək ki, Azərbaycan tərəfini rəsmi olaraq Azərbaycanın AİHM-dəki səlahiyyətli nümayəndəsi Çingiz Əsgərov təmsil edib.

Azərbaycanlı məcburi köçkünlərin iddialarını isə Azərbaycan Prezident Administrasiyasının hüquq-mühafizə orqanları ilə iş şöbəsinin baş müşaviri Otari Qvaladze, vəkillər Malkom Şou, Urdaneta Vitek, Qabriel Lanski və Hannes Tretter müdafiə ediblər.

---------------------------

Gələn həftə Avropa məhkəməsində tarixi işə yekun vurulacaq. ANS PRESS-in məlumatına görə, bu barədə məşhur "Newsweek" jurnalı yazıb."Newsweek" iyunun 16-da İnsan hüquqları üzrə Avropa Məhkəməsində baxılan "Çıraqov Ermənistan Respublikasına qarşı" və "Sarkisyan Azərbaycan Respublikasına qarşı" işlərini şərh edib.Londonda Middlseks Universitetində İnsan hüquqlarının müdafiəsi Avropa mərkəzinin (EHRAC) direktoru, professor Filipp Liç bu işləri "uzun müddət aparılan mübarizə" adlandırıb.

Filipp Liç qeyd edir ki, bütün Avropa üzrə qaçqınlara toxunan tarixi qərar qəbul edilmiş ola bilər.

Onun sözlərinə görə, bu işdə qaçqınların və məcburi mühacirlərin hüquqları haqqında çox əhəmiyyətli suallar meydana gəlir. "Müsbət nəticə qərarın həlli olacaq, çünki əvvəl Avropa Məhkəməsinə belə vəziyyətə baxmaq lazım olmurdu, və bu hökumətlərə qarşı hüquqları qaçqınlara verəcək", – deyə Liç bildirib.

Filipp Liç əlavə edib ki, müsbət nəticə belə işlərin sayının artımına gətirib çıxara bilər: "Bu Avropada olan qaçqınlar üçün də president ola bilər".

Professor həmçinin düşünür ki, müsbət nəticə münaqişənin siyasi nizama salması üzrə iki ölkənin arasında danışıqları canlandıra bilər.

Gələn həftə İnsan Hüquqları üzrə Avropa məhkəməsində "Sarkisyan Azərbaycan Respublikasına qarşı" və "Çıraqov Ermənistan Respublikasına qarşı" işləri üzrə dinləmələr keçiriləcək. Avropa məhkəməsinin Ali palatası iyunun 16-da hər iki iş üzrə hökm çıxardacaq.

İnsan hüquqları üzrə Avropa Məhkəməsi 2010-cu il sentyabrın 15-də ilk dəfə Azərbaycana qarşı erməni ailəsinin iddiasının müzakirəsinə başlayıb.