Türkiyə-ABŞ arasında sərt telefon diplomatiyası

Çavuşoğlu amerikalı həmkarına, bölgədə baş verənlərə tamaşaçı qalmayacaqlarını deyib.

Ötən həftə ABŞ Dövlət katibi Con Kerri ilə Türkiyənin xarici işlər naziri Mövlud Çavuşoğlu arasında telefon danışığı olub. Anspress-in Türkiyə mətbuatına istinadən verdiyi məlumata görə, tərəflər arasında kəskin xarakterli telefon danışığı baş tutub. İyunun 26-da baş tutan danışıq zamanı Çavuşoğlu amerikalı həmkarına, bölgədə (Suriya və İraqda) baş verənlərə tamaşaçı qalmayacaqlarını deyib.

Bu çərçivədə PYD-nin regionda “kürd dəhlizi” yaratmaq cəhdlərinin Türkiyənin milli təhlükəsizliyi üçün təhdid olduğunu deyən Çavuşoğlu, ölkəsinin hər hansı bir “oldu-qurtardı”ya izn verməyəcəyini vurğulayıb.

“Türkiyə “oldu-qurtardı”ya izn verməyəckdir. Bölgədə təcili olaraq təhlükəsiz ərazi yaradılmalıdır. Bunu birlikdə edək. Və ya biz başımızın çarəsinə baxarıq. Təşvişlərimizi nəzərə almalısınız.” - deyə Türkiyə XİN rəhbəri bildirib.