Türkiyə tankları Suriya sərhədində

Ankara cənub qonşusuna 18 minlik ordu yeritməyi planlaşdırır

Türkiyə ordusu Qaziantep vilayətinin Suriyanın Carablu şəhəri ilə sərhəddə yerləşən Karkmış və Kilis yaşayış məntəqələrinə zirehli texnika yeridib.

Anspress-in məlumatına görə, Türkiyə ordusunun bölmələri diqqətlə İŞİD-in Carabludakı hərəkətini izləyirlər.

Hazırda Suriyanın Hələb əyalətində İŞİD-lə müqavimət qüvvələri arasında döyüşlər davam edir.

Yada salaq ki, daha öncə bildirilmişdi ki, Türkiyə Suriyaya 18 minlik ordu yeritməyi planlaşdırır.

Suriyadakı inkişafların bu jür gərginləşdikdən sonra Türkiyə Silahlı Qüvvələrinə "Hazır ol!" əmri verilib. Ankara həmçinin İŞİD-ə qarşı mübarizə koalisiyasının başçısı ABŞ-a da önəmli mesajlar verib:

- Ankara Suriyada yaşananlardan narahatdır. Bu, nəzərə alınmalıdır.

- Türkiyə Suriya sərhədində hər hansı bir dəyişikliüyə icazə verməyəcək.

- ABŞ lazımi tədbirləri görməzsə, Türkiyə bildiyini edəcək.

Həmçinin, PKK bəyan edib ki, əgər Ankara Suriyaya qoşun yeridərsə, Türkiyəni hərbi əməliyyatlar teatrına çevirəcək.