PUTİN BAKI ƏLEYHİNƏ YENİ LAYİHƏNİ İŞƏ SALIR - Kreml sabiq nazir və generalı hərəkətə keçirdi
"Yeni geosiyasi çağırış adı altında Avrasiya ideyasını aktuallaşdırmaq yaşının bu vaxtında Nəriman müəllimin, ya İlqar Qasımovun heç də öz ideyası ola bilməz”
Azərbaycanın keçmiş milli təhlükəsizlik naziri Nəriman İmranov və Rusiyanın Ədliyyə Nazirliyinin keçmiş əməkdaşı, ikinci dərəcəli dövlət müşaviri İlqar Qasımov Azərbaycanın bir qrup ictimai və siyasi xadimləri ilə birlikdə Azərbaycanda Avrasiya hərəkatı yaradır. Bu barədə virtualaz.org saytına təşəbbüs qrupunun üzvlərindən biri məlumat verib.Nəriman İmranovun və İlqar Qasımovun əsas məqsədi Azərbaycanda Putinin Avrasiya İttifaqı ideyasını populyarlaşdırmaqdır.
Bugünlərdə təşəbbüs qrupu hərəkatın rəsmi qeydiyyatı üçün Ədliyyə Nazirliyinə müraciət edib. “Dünyada baş verən mürəkkəb iqtisadi-siyasi proseslər və yeni geosiyasi çağırışlar avrasiyaçılıq ideyasının aktuallaşmasını təbii olaraq ön plana çıxarır, onun müvafiq milli hərəkat formasında təşkilati-praktiki həllini israrla tələb edir” deyə, təşəbbüs qrupunun bəyanatında deyilir.
Azərbaycanda ölüm cəzası ləğv ediləndən sonra N.İmranov Qobustan həbsxanasında ömürlük cəza çəkib. 2002-ci ildə Heydər Əliyevin fərmanı ilə əfv edilib.
2002-ci ildən Nəriman İmranov ictimai-siyasi fəaliyyətlə məşğul deyildi. Onun gözlənilmədən Rusiya Ədliyyə Nazirliyinin generalı ilə siyasi səhnədə peyda olması böyük marağa səbəb olub.
Xatırladaq ki, son seçkilər ərəfəsində baş nazirin keçmiş birinci müavini Abbas Abbasovun və Milli Şuranın sədri Rüstəm İbrahimbəyovun rəhbərliyi ilə Rusiyada yaşayan azərbaycanlı milyarderlərdən ibarət “Milyarderlər ittifaqı” yaradılmışdı. Təşkilatın məqsədi Azərbaycan hakimiyyətinə təzyiq göstərərək xarici siyasətdə mühüm dəyişikliklərə məcbur etmək idi. Amma bugünlərdə A.Abbasov təşkilatın fəaliyyətini dayandırdığını bəyan etdi və hesab edilirdi ki, burada Bakı ilə Moskva arasındakı anlaşmaların da rolu olub. Eyni zamanda A.Abbasovun qardaşının həbsi, digər ailə üzvlərinə qarşı təzyiqlərin də bu təşkilatın sonuna rəvac verdiyi iddia olunur.
Prezident seçkiləri ərəfəsində “Milyarderlər ittifaqı” Azərbaycanın daxilində kifayət qədər narahatlıqlar yaratmağa müvəffəq olmuşdu. Odur ki, Azərbaycan hakimiyyəti bu projenin durdurulması üçün xeyli əziyyət çəkməli oldu.
İndi də parlament seçkiləri ərəfəsində bənzər layihə işə salınıb. Bu mənada hesab olunur ki, Kremlin Azərbaycanı Avrasiya İttifaqına qoşmaq üçün böyük səylər göstərdiyi zamanda adları Rusiya dairələrinə bağlı olan şəxslərin təşəbbüs qrupu yaratması təsadüfi görünmür. Təşkilatçılar açıq şəkildə deyirlər ki, Azərbaycanın Avrasiya Birliyində yer almasına səy göstərəcəklər.
Odur ki, ortaya sual çıxır: bu, Kremlin növbəti oyunu ola bilərmi?
Yeri gəlmişkən, bir müddət öncə Putin Azərbaycanın Şanxay Əməkdaşlıq Təşkilatında yer alacağının anonsunu vermişdi. Həmçinin Bakının Gömrük İttifaqına qoşulacağı halında Qarabağ məsələsində tənzimlənməyə start veriləcəyi barədə rus ekspertlərindən açıqlamalar silsiləli qaydada eşidilməyə başladı. Belə bir məqamda ABŞ və Avropa İttifaqı rəsmilərinin Bakıya səfəri, münasibətlərdə mülayimləşmənin müşahidə edilməsi Rusiyanı razı sala bilməzdi. Sabiq MTN-çilərin hərəkətə keçməsi bu mənada təsadüf sayılmır.
Sabiq milli təhlükəsizlik xidməti zabiti İlham İsmayıl “Yeni Müsavat”a dedi ki, bu kimi addımların atılması heç vaxt səbəbsiz olmur: “Həbsdən çıxandan uzun müddət sonra keçmiş nazirin və İlqar Qasımovun qəfildən belə bir addımı atması təbii ki, arxada bir qüvvənin olmasından xəbər verir.
İkincisi də birdən-birə hər şeyi unutmuş adamların yenidən indiki dövrdə, yaşlarının bu vaxtında siyasi səhnəyə qayıtması, sadəcə olaraq, öz təşəbbüsləri kimi dəyərləndirilə bilməz. Bu təşəbbüsün arxasında elə deyildiyi kimi, Rusiya dayana bilər”.
İ.İsmayıl güman edir ki, buna rəvac verən başqa bir məsələ də rəsmi Bakı ilə Avropa arasındakı soyuq münasibətlərdir: “Yəni bunu son dövrdə Azərbaycan rəsmilərinin Avropaya qarşı olan qəzəbli, tənqidi münasibətinin nəticəsi kimi dəyərləndirmək lazımdır. Həm Rusiya, həm Rusiya ətrafında dayanan, avrasiyaçılıq ideyası ilə ”silahlanmış" qüvvələr fürsətdən istifadə edirlər, bu ideyanın aktuallaşması səbəbi ilə önə çıxırlar. Azərbaycan rəsmilərinin Avropaya ünvanlı tənqidi münasibətlərinin tez-tez ortaya çıxması da buna rəvac verən məsələlərdən biridir.
İ.İsmayıl Nəriman İmranovun Azərbaycanda yaşadığını qeyd etdi və bildirdi ki, vaxtilə onun rəhbərlik etdiyi nazirlikdə işləyib: “O, mənim nazirim olub, bir neçə dəfə Dağlıq Qarabağda ezamiyyətdə olmuşuq. Lakin o, heç vaxt anti-Azərbaycan mövqeyində olmayıb. Bu bəyanatda da hiss olunur ki, guya orada anti-Azərbaycan mövqeyi yoxdur. Amma hamı bilir ki, yeni geosiyasi çağırış adı altında Avrasiya ideyasını aktuallaşdırmaq yaşının bu vaxtında Nəriman müəllimin, ya İlqar Qasımovun heç də öz ideyası ola bilməz”.
Ekspert qeyd etdi ki, Azərbaycanda bu ideyaya daha kimlərin dəstək verməsi bir azdan sonra bəlli olacaq: “Ümumiyyətlə, burada Azərbaycanın Rusiyanın təsiri altında olmasını istəyən siyasi qüvvələr, yaxud qeyri-siyasi adamlar çoxdur. Azərbaycanda ”Beşinci kolon" mövcuddur. Hər halda, bu, ciddi məsələdir. Düzdür, bu, Azərbaycanda özünün geniş ətrafını tapmayacaq. Amma bunu nəzarətsiz də buraxmaq olmaz".
Şərhlər
Hər hansısa bir şərh yazılmayıb.