Mirmahmud Mirəlioğlu yenə sədr seçildi - Fotolar

 Qurultayda açıq səsvermə keçirilib və sədrliyə namizəd ancaq köhnə sədr Mirmahmud Mirəlioğlu olub. O, açıq səsvermə nəticəsində yenidən KXCP-nin sədri seçilib.  Musavat.com-un məlumatına görə, M.Mirəlioğlu çıxış edərək etimada görə təşəkkürünü bildirib. O, həmçinin qeyd edib ki, bu, onun namizədliyini irəli sürdüyü sonunu qurultaydır: “Növbəti qurultayda mən namizəd olmayacam. Mənim namizədim olacaq. Həmin namizəd gənc olacaq. Baxın, zalda gənclərimizin sayı barmaqla sayılacaq qədərdir”. 

* * * 

Səttar Bəhlulzadə adına Mədəniyyət Sarayında Klassik Xalq Cəbhəsi Partiyasının (KXCP) III qurultayı keçirilir.

APA-nın məlumatına görə, qurultayda KXCP sədri Mirmahmud Mirəlioğlu çıxış edib.

M. Mirəlioğlu bildirib ki, 55 rayonda qurultaya hazırlıq üzrə konfrans keçirilib, 298 nümayəndə seçilib. O, qurultayda 230 nümayəndənin qeydiyyatdan keçdiyini bildirərək, yetərsayın olduğunu qeyd edib.

Daha sonra mandat və say komissiyası seçilib.

Sonra qurultaya qonaq qismində dəvət olunan siyasi partiyaların rəhbərləri çıxış edib.

Qurultayda Müsavat Partiyasının sabiq başqanı İsa Qəmbər, BAXCP, VHP, AXP, VİP, Ədalət Partiyası, AMİP və digər partiyaların sədrləri iştirak edirlər.

AXCP sədri Əli Kərimli və Müsavat başqanı Arif Hacılı qurultaya dəvət olunsa da, qatılmayıblar.

Dəvət olmasına baxmayaraq, YAP-dan qurultayda iştirak edən yoxdur.

* * * 

Bu gün- avqustun 1-də Klassik Xalq Cəbhəsi Partiyasının (KXCP) üçüncü qurultayı keçiriləcək. Qurultay Bakının Əmircan qəsəbəsində, Səttar Bəhlulzadə adına Mədəniyyət Evində baş tutacaq. Hələlik ancaq partiya üzvləri gözə dəyir.

Ancaq ölkənin bir sıra partiyalarının rəhbərlərinin qurultaya qonaq qismində dəvət edildiyi bildirilir. Qurultayda KXCP-yə sədr seçkisi də nəzərdə tutulub. Hələlik ancaq indiki sədr Mirmahmud Mirəlioğlu öz iddiasını ortaya qoyub.

Həmçinin, bu ilin sonunda keçiriləcək parlament seçkiləri ilə bağlı da müzakirələr gözlənilir. KXCP seçkidə iştiraka qərar verib. /musavat.com