Türkiyə sualtı qayıqları Rusiyanın ən nəhəng kreyserinə yaxınlaşdı

Türkiyənin sualtı qayıqları Suriya sahillərindəki "Moskva" kreyserinin addımlarını diqqətlə izləyir.

APA TV-nin Rusiya mətbuatına istinadən xəbərinə görə, sözügedən hərbi gəmilərdən ikisi hazırda Latakiyada yerləşən və Rusiyaya məxsus "Xmeynim" aviabazısını mühafizə edən kreyserin olduğu ərazidədir.

Türkiyə Silahlı Qüvvələrinin Baş Qərargahından verilən məlumata görə, hazırda Aralıq dənizinin Şərq hissəsinin mühafizəsinə bu ölkəyə məxsus iki sualtı qayıq cəlb olunub. Onlardan biri əraziyə noyabrın 7-də, digəri isə 11-də göndərilib. Türkiyəyə məxsus "F-16" qırıcısının "Su-24" bombardmançısına hücumundan sonra Aralıq dənizinin şərqində mövqe tutan "Moskva" kreyseri Suriya sahillərinə doğru yerdəyişmə edib.

Rusiya Baş Qərargahının məlumatına görə, "S-300" sisteminin analoqu olan "Fort" Hava Hücumundan Müdafiə Sistemi ilə təchiz olunan "Moskva" kreyseri noyabrın 25-dən Suriyanın Latakiya vilayətinə yaxın ərazidə mövqe tutaraq, Rusiya hərbi bazasının hava hücumlarına qarşı müdafiəsini təşkil edir. Bu arada Rusiya Baş Qərargahının nümayəndəsi Sergey Rudskoy potensial təhlükə yaradacaq istənilən hədəflərin dərhal məhv ediləcəyi ilə bağlı xəbərdarlıq edib. Rusiya Silahlı Qüvvələrinin Baş Qərargahından o da bildirilib ki, "Xmeynim" aviabazasında Rusiya Hərbi Kosmik Qüvvələrinin təhlükəsizliyini təmin etmək məqsədilə "S-400" zenit-raket sistemləri də quraşdırılıb.