Tağı Əhmədov bu sözlərinə görə işdən çıxarılıb - "Mən icraçıyam..."

Tanınmış vəkil Aslan İsmayılov Metropolitenin işdən azad edilmiş rəisi Tağı Əhmədov barəsində maraqlı fikirlərlə çıxıç edib. Onun Facebook-da paylaşdığı açıqlamanı Bizimyol.info-ya istinadən olduğu kimi təqdim edirik:

"Tağı Əhmədovun vəzifəsindən kənarlaşdırılması sosial şəbəkələrdə toy bayram edənləri başa düşməkdə çətinlik çəkirəm. Bir çox ölkələrdə Nazirlər kabinetini ildə bir dəfə dəyişirlər, Ukraynada bütün sistemi dəyişdilər sanki burada da oxşar hadisə baş verib. Azərbaycan məmurlarını az çox tanıdığımdan deyə bilərəm ki, Tağı Əhmədov işlədiyi sahəni bilən çox az məmurlardan biri idi. Şəxsən tanımasam da, bildiyim qədər metropoliten sahəsində sıravi maşinistdən rəhbər vəzifəsinə qədər, əziyyət çəkərək, bütün pillələri keçib. Bütün təsərrüfat sahələrində ən mürəkkəb və dəqiq iş qaydası tələb olunmasına baxmayaraq, metropolitenin digər sahələrlə müqayisədə heç də ən pisi olmasını düşünmürəm. İnsan kimi zahiri davranışında nə qədər kobud olsa da, daxilən zəngin insan olmasını iştirak etdiyim çoxsaylı mədəni tədbirlərdə görmüşəm. Telekanallarda ədəbi müzakirələr zamanı onun çıxışını dinləyənlər ədəbi mühiti yaxşı bilməsini dana bilməzlər. Başlıcası, onun vəzifəsindən kənarlaşdırılmasına, guya səbəb olan, müxbirlərlə kobud davranması da onun səmimiliyindən xəbər verir. Axı başqa məmurlar, heç bizi adam yerinə qoyub, müsahibə də vermirlər. Tağı Əhmədov isə müxbirlərlə ən çox ünsiyyətdə olan məmurlardan idi. Zənnimcə müsahibələrinin birində "28 May" metro stansiyasında Məhəmməd Əmin Rəsulzadənin təsviri olan mozaikanı sökülməsi ilə bağlı müxbirin sualına "Mən icraçıyam. Mənə desələr ki, sizin şəklinizi vurmaq lazımdır ora, onu qoyacam" səmimi cavabı onun vəzifəsindən azad olunmasına səbəb oldu. Görünür insanlar məmurlardan o qədər narazıdırlar ki, heç bir təhlil aparmadan istənilən məmurun vəzifədən kənarlaşdırılmasına sevinirlər.

P.S. Hər nə olursan ol, ya olduğun kimi görün, ya göründüyün kimi ol.

Hz. Mevlana"

Qeyd edək ki, Metropolitendə mətbuat satışının qadağan olunmasının səbəbləri barədə suala da Tağı Əhmədov oxşar çavab vermişdi. Bunun "yuxarıların" göstərişi olduğunu, özünün bu tapşırığı içra etdiyini söyləmişdi. Məsuliyyəti həmişə "aşağıların" üzərinə qoyan "yuxarılar" görünür, Tağı Əhmədovun bu çavablarından xoşlanmayıb.

Vaqif

AzPolitika.info