"SAHİBKARLARDAN 20-30 MİN TƏLƏB EDİRLƏR..." - Deputatdan Vergilər Nazirliyinə ittiham

“Adam lap xəcalət çəkir...”

Millət vəkili Fazil Mustafa parlamentin yaz sessiyasının ilk iclasında qanunvericilik işləri planı ilə bağlı danışarkən, bir sıra məsələlərə toxunub. Moderator.az-ın məlumatına görə, deputat qeyd edib ki, ölkə prezidenti İlham Əliyev çıxışlarında sahibkarlığa dəstək verilməsindən danışır. Bütün məmurların qarşısında ciddi tapşıqlar qoyur:

“Amma Vergilər Nazirliyi devalvasiyadan əvvəl sahibkarlardan 10 min alırdısa, indi qiyməti 20-30 minə qaldırıblar. Bundan əlavə, biz “İctimai iştirakçılıq haqqında” qanunu ona görə qəbul etdik ki, onun işləmə mexanizmi olsun. Amma görürük ki, bu qanunların qəbulu populizmdən başqa bir şey deyil. Biz “Elm haqqında” qanunu qəbul edəcəyiksə, onu plana salaq. Elm adamları bu qanunun qəbulunu çoxdan gözləyirlər. Məncə, bu sessiyada qanun qəbul edilməlidir”.

“Kinematoqrafiya haqqında” qanuna gəlincə isə, millət vəkili bildirib ki, bu qanunun yenidən hazırlanmasına ehtiyac var: “Azərbaycan kinostudiyasına girəndə adam xəcalət çəkir. Kino çəkilmək çün bu qədər pullar ayrıldı. Amma ortada keyfiyyətli bir kino, teleserial yoxdur. Bu pullar hara getdi?”.