"AKİF ÇOVDAROV SON GÖRÜŞDƏ DEDİ Kİ..." - Vəkildən sensasion açıqlamalar

1448266117_covdarov-mehkeme2

Ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarovun vəkili Sadiq Rəsulov “Yeni Müsavat”a müsahibə verib. Həmin müsahibəni təqdim edirik.

Ötən il noyabrın 15-də həbs olunan A.Çovdarov Bakı İstintaq Təcridxanasına göndərilib. Aylardır orada saxlanılan A.Çovdarov bir neçə gün əvvəl təcridxanada aclığa başlayıb. Vəkilə ilk sualımız da elə aclıq aksiyasının səbəbi ilə bağlı oldu:

- Akif Çovdarovun aclıq aksiyasına başlaması aparılan istintaqla bağlıdır. Digər təqsirləndirilən şəxslərdən fərqli olaraq Akif Çovdarov xəstədir. İstintaq qərar qəbul edib ki, Akif Çovdarov hər gün 3-4 cildlə tanış olmalıdır və istintaq avqustun 30-da yekunlaşmalıdır. Akif Çovdarovun səhhəti isə buna imkan vermir. Ona görə də o, aclıq aksiyası keçirir, ona işlə tanış olmaq üçün şərait yaradılmasını istəyir. Hesab edir ki, istintaqın qərarı qanunsuzdur, qəsdən onun işlə tanış olmasının qarşısını almağa yönəlib. Deyir ki, mənə imkan verin ki, iş materialları ilə tanış olum.

- Sizcə, istintaqın Akif Çovdarova qarşı mövqeyi niyə belədir? 

- Ona deyirlər ki, digər təqsirləndirilən şəxslər iş materialları ilə tanış ola bilirlər. Nəzərə almırlar ki, onlar cavan və sağlamdırlar, səhhətlərində heç bir problem yoxdur. Digər tərəfdən, Akif Çovdarovdan fərqli olaraq həmin şəxslərə 50-dən çox cilddən ibarət iş materiallardakı cildlərin 4-5-i aiddir. Amma Akif Çovdarova bütün cildlərin aidiyyəti var və o, bütün cildlərlə tanış olmalıdır. Bu məsələ ilə bağlı Akif Çovdarovla istintaq arasında fikir ayrılığı yaranıb və o, avqustun 19-dan aclığa başlayıb.

- Qanunla təqsirləndirilən şəxs hansı müddət ərzində cinayət işinin materialları ilə tanış olmalıdır?

 - Qanunda konkret müddət göstərilməyib, ağlabatan müddət ifadəsindən istifadə edilib. Akif Çovdarov bacardığı qədər cinayət işinin materialları ilə tanış ola bilir. Nəzərə alınmalıdır ki, o, mütəmadi olaraq tibbi-sanitar hissədə müayinə və müalicələrdən keçir. O, hər gün bu prosedurlardan keçdiyindən 11-12-yə qədər iş materialları ilə tanış ola bilmir. Çünki həkimlərin müayinə və müalicəsində olur. Bundan başqa, onda ürək ağrıları var. Onun 8-9 saat cinayət işi materialları ilə tanış olmasına vaxtı qalmır. Gün ərzində maksimum 5 saat iş materialları ilə tanış ola bilir. Cinayət işinin materialları da kifayət qədər genişdir. Hər cilddə 250 səhifə var. Onun hər gün 1000 səhifə oxumaq imkanı yoxdur.

- MTN-də idarə rəisi işlədiyi dövrdə səhhətindəki problemlər normal çalışmasına imkan verirdi? 

 - Həmin dövrdə də səhhətində problemlər olub. Akif Çovdarovu şəxsi həkimi nəzarətdə saxlayıb. O dövrdə qidalanması da fərqli olub. Həmin dövrdə gündə 5 dəfə ona ev şəraitində hazırlanmış yeməklər verilib. Gün ərzində 4-5 dəfə az-az olmaqla fasilələrlə yemək yeyib. Bakı İstintaq Təcridxanasında Akif Çovdarova digər təqsirləndirilən şəxslər kimi həftədə 1 dəfə sovqat qəbul olunur. Həmin sovqatda olan yeməklər isə qaldıqca boyatlaşır, bu isə Akif müəllimin səhhətinə ziyandır.

- Bakı İstintaq Təcridxanasında saxlanılan Beynəlxalq Bankın sabiq prezidenti Cahangir Hacıyev oradakı kameralarda dözülməz istidən şikayətlənir. Akif Çovdarovun bu baxımdan vəziyyəti necədir? 

 - Bu barədə məlumatsızam.

- Belə məlumat var ki, kondisionerli otaqda saxlanılır.

 - Akif Çovdarovun ürəyində problemləri var, mədəsindən də əməliyyat olunub. Mədəsində xərçəng olduğuna görə mədəsini çıxarıblar, qida borusunu birbaşa bağırsağına birləşdiriblər. Sonuncu dəfə ekspertizadan keçiriləndə müəyyən olundu ki, bağırsağında yenidən iltihab var.

- Akif Çovdarova Ombudsman Aparatindan baş çəkən olub? 

 - Onun ailə üzvləri ombudsmana müraciət ediblər. Gələn olmayıb.

 

- Akif Çovdarov sizinlə görüşə sərbəst gələ bilirmi?

- Bu gün görüşə çox çətinliklə gəldi. Dedi ki, növbəti görüşə yəqin ki, gələ bilməyəcək.

 

 - Onu aclıq edən dustaq kimi qeydiyyata alıb həkim nəzarətinə götürüblərmi? 

- Akif Çovdarov tibbi-sanitar hissədə qalır deyə faktiki həkim nəzarətindədir.

 

- Əvvəlki açıqlamalarınızda demişdiniz ki, Akif Çovdarovu tibbi-sanitar hissəyə köçürmürlər. Nə vaxt köçürülüb ora? 

- Bu ilin fevralından sonra köçürüblər.

- Belə məlumatlar vardı ki, Akif Çovdarovun səhhətindəki problemlərin ictimailəşdirilməsi onun həbsdən azad edilməsi üçündür. Bu məlumatlarla tanışsınızmı? 

-  Belə bir məsələdən xəbərsizəm.

- Akif Çovdarovla əlaqədar cinayət işinin digər MTN-çilərin işindən ayrılaraq ayrıca icraata verilməsi nə ilə əlaqədardır? 

- Bu suala istintaq orqanı cavab verə bilər. Bunun bir çox səbəbi ola bilər. Azərbaycanda o boyda məhkəmə zalı yoxdur ki, o qədər şəxsi eyni vaxtda ora aparıb məhkəmə araşdırması aparılsın. Orada o qədər adamlar var ki, bir qurumda işləsələr də, bir-birilərinə aidiyyətləri olmayan şəxslərdir. Bir şəxsin ittihamının digərinə aidiyyəti yoxdur. Düşünürəm ki, işin ayrılması bu məsələ ilə bağlı ola bilər.

 

- Akif Çovdarov onunla bərabər hakim qarşısına çıxarılacaq şəxsləri tanıyırmı?   

- Həmin 3 şəxs Akif Çovdarovun işçiləri olub.

 

- Akif Çovdarov ittihamları qəbul edirmi? 

- Xeyr, o, ilk gündən ittihamları qəbul etmir.

- Akif Çovdarovun Eldar Mahmudovun əleyhinə dolayısı ilə, birbaşa ifadələr verməsi haqda məlumatlar var. Bu məlumatlar nə dərəcədə doğrudur? 

- Bu haqda nəsə deyə bilmərəm. Bu istintaq sirridir.

- Akif Çovdarovla Eldar Mahmudov üzləşdirilibmi? 

- Belə bir şey olmayıb.

- Akif Çovdarovun yaxınlarının ölkədən çıxışlarına məhdudiyyət qoyulduğu və əmlaklarının əllərindən alındığı haqda xəbərlər var. Bu xəbərlər nə dərəcədə doğrudur?

 - Düzdür, Akif Çovdarovun ailə üzvlərinin - oğlunun, qızının və digər yaxınlarının ölkədən çıxışına qadağa qoyulub. Əmlaklarının əllərindən alınması isə məhkəmə qərarı ilə mümkündür. Belə məhkəmə qərarı isə yoxdur.

- Əmlakların üzərinə həbs qoyulub? 

- Bu barədə məlumatsızam.

- Mətbuatda Akif Çovdarovun oğurladığı şəxsləri özünə məxsus və Bakıətrafı kəndlərdən birindəki istixanadakı xüsusi düzəldilmiş, yerin altında olan şəxsi təcridxanada saxlaması haqda xəbər vardı. İstintaqçılar Akif Çovdarovun iştirakı ilə həmin yerə baxış keçiribmi?   

- İstintaq o yer yoxdur ki, ora gedib baxmasın. Belə bir yer olsa idi, tapardılar.

 

- İş adamları, ən müxtəlif peşə sahibləri var ki, mətbuatda Akif Çovdarovun əməllərindən zərər çəkdiklərini bəyan ediblər. Akif Çovdarovun onları şəxsən təhdid etdiyini, döydüyünü, pullarını, mal-mülklərini əllərindən aldığını açıqlayıblar. 

 - Belə ittihamlar yoxdur.

- Necə yoxdur? 145-ci maddə - adam oğurluğu nə üçün ittihamda yer alıb? 

 - İttihamın verilməyi o demək deyil ki, həmin fakt təsdiqini tapır. Akif Çovdarov ittihamları qəbul etmirik. Bu məsələlər məhkəmədə araşdırılacaq.

 

- Akif Çovdarov məhkəmənin qapalı, yoxsa açıq keçirilməsini istəyir?

 - Belə bir sualla ona müraciət etməmişəm. İstənilən halda bu məsələ məhkəmənin səlahiyyətindədir.

- Məhkəmə qərar qəbul edərkən Akif Çovdarovun da fikrini soruşacaq. Bu halda Akif Çovdarov nə deyəcək? 

 - Bu məsələ məhkəmədə aydın olacaq.

 

- Bu sualın yaranması Akif Çovdarovun ittihamları qəbul etməməsindən qaynaqlanır. Əgər Akif Çovdarov ittihamları qəbul etmirsə, deməli, ictimaiyyətdən gizli bir işi yoxdur və ictimailəşməsindən də çəkinmir, müvafiq olaraq məhkəmənin açıq keçirilməsini tələb etməlidir.

 -  Bu məsələ ilə bağlı məhkəmədə münasibət açıqlayacaq.

- Akif Çovdarovun həddən çox informasiyalı olması onun iş yoldaşı İlqar Əliyev kimi qəfil və müəmmalı ölümünə yol aça bilərmi?  

 - Nə deyim? Hə və ya yox deyə bilmərəm. Bircə onu deyə bilərəm ki, səhhəti çox ağırdır, xəstədir. Avqustun 19-da başladığı aclıq aksiyası isə onun səhhətini daha da ağırlaşdırır.

 

- Akif Çovdarova təzyiqlər var?

- Şəxsən ona təzyiq yoxdur. Amma istintaq hərəkətlərinin bu şəkildə aparılmasını özünə təzyiq kimi qəbul edir. İstintaqdan tələb edirlər ki, qısa müddət ərzində işlə tanış olsun. Bunu özünə təzyiq kimi qəbul edir. Hər gün 3-4 cildlə tanış olmasının tələb şəklində ortaya qoyulmasını təzyiq sayır. Hesab edir ki, normal insan gün ərzində 1000 səhifə ilə tanış ola bilməz. Gündə 1 cildlə tanış olub oxumaq, qeydiyyat aparmaq olar. Bundan artıq cildlə tanış olmaq keyfiyyətli müdafiəyə problem yaradır.

-Siz istintaqın qərarını mübahisələndirmək üçün addımlar atmısız? 

 - Biz istintaqın həmin qərarından şikayət vermişik. Bu həftə ərzində Səbayel Rayon Məhkəməsində bizim şikayətə baxılacaq. Məhkəmə bizim şikayəti təmin etsə, iş materialları ilə əvvəlki qaydada tanış olacağıq. Olmazsa, işi avqustun 30-da yekunlaşdırıb göndərəcəklər məhkəməyə.  Akif Çovdarov və digər təqsirləndirilən şəxslərlə bağlı cinayət işinə Bakı Hərbi Məhkəməsində baxılacaq.

 

Qeyd edək ki, A. Çovdarov Cinayət Məcəlləsinin 308.2 (vəzifə səlahiyyətlərindən sui-istifadə), 308.1-ci (məcəllənin bu maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (rüşvət alma (passiv rüşvətxorluq) təkrar törədildikdə), 311.3.3 (rüşvət alma (passiv rüşvətxorluq) külli miqdarda törədildikdə), 311.3.4 (rüşvət alma (passiv rüşvətxorluq) hədə-qorxu tətbiq olunmaqla törədildikdə), 145.3-cü (qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə ittiham olunur.

*********************

Vəkil: "Nə yemək yeyir, nə də dərman qəbul edir"

Ləğv edilmiş Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi Akif Çovdarov 1 saylı Bakı İstintaq Təcridxanasında aclıq aksiyasına başlayıb.

Bu barədə Trend-ə A.Çovdarovun vəkili Sadiq Rəsulov məlumat verib.

Vəkil bildirib ki, A.Çövdarov aksiyaya avqustun 19-dan başlayıb: "Avqustun 22-də təcridxanada Akif Çovdarovla görüşdüm. Ayın 19-dan nə yemək yeyir, nə də dərman qəbul edir. Hazırda vəziyyəti yaxşı deyil".

Vəkil qeyd edib ki, A.Çovdarov aclıq aksiyasına başlaması barədə Baş Prokurorluğa və Ədliyyə Nazirliyinin Penitensiar Xidmətinə rəsmi məlumat verib.

Xatırladaq ki, A.Çovdarov səhhəti ilə əlaqədar 1 saylı Bakı İstintaq Təcridxanasının tibb məntəqəsində həkim nəzarətində saxlanılır.

A.Çovdarov 2015-ci il noyabrın 14-də həbs olunub. 2015-ci il noyabrın 15-də Səbail rayon Məhkəməsinin qərarı ilə A.Çovdarov barəsində 3 ay müddətinə həbs qətimkan tədbiri seçilib. Bu ilin fevral ayında isə A.Çovdarovun barəsində seçilmiş həbs qətimkan tədbiri 4 ay müddətinə artırılıb.

A.Çovdarova qarşı Cinayət Məcəlləsinin 308.2 (Vəzifə səlahiyyətlərindən sui-istifadə, bu Məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (Rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (Rüşvət alma (passiv rüşvətxorluq) təkrar törədildikdə), 311.3.3 (Rüşvət alma (passiv rüşvətxorluq) külli miqdarda törədildikdə), 311.3.4 (Rüşvət alma (passiv rüşvətxorluq) hədə-qorxu tətbiq olunmaqla törədildikdə) və 145.3-cü (Qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə cinayət işi açılıb.

635x100

Şərhlər

Hər hansısa bir şərh yazılmayıb.

Son yazılar