"Göteborq" "Qarabağ"dan UEFA-ya şikayət etdi

"Göteborq" Avropa Liqasının pley-off mərhələsində səfərdə "Qarabağ"a 3:0 hesablı məğlubiyyətdən sonra qarşılaşmanın keçirildiyi Tofiq Bəhramov adına Respublika stadionun ot örtüyü ilə bağlı Ağdam klubundan UEFA-ya şikayət edib.

Qol.az-ın İsveç mətbuatına istinadən yaydığı xəbərə, bu haqda "Göteborq"un idman direktoru Mats Qren bildirib. O deyib ki, oyundan dərhal sonra UEFA-ya yazılı şəkildə şikayət ediblər:

"UEFA-da bir çox qayda var. Nədənsə, oyunun yaxşı qazonda keçirmək barədə qayda yoxdur".

İsveç klubu hesab edir ki, futbolçuları Mikael Boman və Soren Riks sırf stadionun qazonunun bərbad olması səbəbindən zədələnib.

M.Boman özü bununla bağlı bildirib:

"Zərbə vurmaq istəyəndə ayağım qazona ilişdi. Bu, indiyə kimi oynadığım ən pis qazondur. "Qarabağ"ın bu cür stadionda oynaya bilməsinə heyran oldum".

Qeyd edək ki, "Göteborq"un baş məşqçisi Andersson Frank komandasının məğlubiyyətinin əsas səbəbinin qazonun olmadığını bildirib.