ÇOVDAROV ÖLÜM ACLIĞINA BAŞLAYIB -10 gündə 12 kiloqram arıqlayıb

Keçmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarov son 10 gündə 12 kiloqram arıqlayıb.

"AzPolitika" xəbər verir ki, bu barədə Lent.az-a onun vəkili Sadiq Rəsulov məlumat verib. Vəkil bildirib ki, A.Çovdarov saxlanıldığı Bakı 1 saylı İstintaq Təcridxanasında 10 gündür aclıq edir. S.Rəsulov bildirib ki, keçmiş MTN generalı avqustun 19-dan aclıq aksiyası keçirir: "Onun səhhətində də problemlər yaranıb, cinayət işi ilə tanış ola bilmir".

Qeyd edək ki, Ədliyyə Nazirliyinin Penitensiar Xidmətindən Çovdarovun aclıq etdiyi xəbəri təsdiqlənmir. Qurumdan Lent.az-a bildirilib ki, A.Çovdarov aclıq keçirdiyinə dair ərizə ilə müraciət etməlidir, lakin ondan bu barədə ərizə daxil olmayıb.

Ancaq Gununsesi.info-nun məlumatına görə, Akif Çovdarov bir neçə gün əvvəl başladığı aclıq aksiyasını davam etdirir. Çovdarovun ailə üzvləri və vəkili ilə görüşdən də imtina etdiyi deyilir. Ötən həftə “Qanlı general”ın ailə üzvləri onunla görüşə getmək üçün Bakı İstintaq Təcridxanasında olsallar da Çovdarov onlarla görüşdən imtina edib. Artıq həyatı ilə barışan general yaşamaq istəmədiyini və aclığı ölənə qədər davam etdirəcəyini bəyan edib.

A.Çovdarovun hüquqlarını müdafiə edən Sadiq Rəsulov killer generalın aclıq aksiyası keçirdiyini təsdiqləsə də, ailə üzvlərindən imtina etmədiyini deyib.“Report”a bildirib ki, onun ailə üzvləri Ombudsmana müraciət edib: “Ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov ailə üzvlərindən və vəkilindən imtina etməsi barədə məlumatlar əsassızdır”.

Akif Çovdarov Cinayət Məcəlləsinin 308.2 (Vəzifə səlahiyyətlərindən sui-istifadə), 308.1-ci (Məcəllənin bu maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 311.3.1 (Rüşvət alma (passiv rüşvətxorluq), qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2 (Rüşvət alma (passiv rüşvətxorluq) təkrar törədildikdə), 311.3.3 (Rüşvət alma (passiv rüşvətxorluq) külli miqdarda törədildikdə), 311.3.4 (Rüşvət alma (passiv rüşvətxorluq) hədə-qorxu tətbiq olunmaqla törədildikdə), 145.3-cü (Qanunsuz azadlıqdan məhrum etmə, iki və ya daha çox şəxsə qarşı törədildikdə; təqsirkar şəxs üçün aşkar surətdə hamilə vəziyyətində olan qadına qarşı törədildikdə; yetkinlik yaşına çatmayan şəxs barəsində törədildikdə; bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə; zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə törədildikdə; silahdan, yaxud silah kimi istifadə edilən əşyalardan istifadə etməklə törədildikdə, bu əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddələri ilə ittiham olunur.

AzPolitika.info