FAZİL MƏMMƏDOV DA VİDADİ ZEYNALOVDAN PUL İSTƏYİR -  255 minlik iddia - Yenilənib

Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilib. APA-nın məlumatına görə, hakim Əfqan Hacıyevin sədrliyi ilə keçirilən iclasda hakim bildirib ki, prosesdə Vergilər Nazirliyinin nümayəndəsi iştirak edir. Hakimin sözlərinə görə, iş üzrə nazirlik 255 min manatlıq mülki iddia qaldırıb.

Daha sonra təqsirləndirilən Səhlab Hümbətovun vəkili onun barəsində seçilmiş həbs qətimkan tədbirinin ev dustaqlığı ilə əvəzlənməsi haqqında vəsatət verib. Məhkəmə vəsatəti təmin etməyib.

Vidadi Zeynalovun vəkili Ceyhun Yusifov isə müdafiə etdiyi şəxsin hamıdan sonra ifadə vermək istədiyini və bunun nəzərə alınmasını xahiş edib.

İclasda məhkəmə istintaqının başlanması elan olunub. Dövlət ittihamçısı Fərid Nağıyev ittiham aktının nəticə hissəsini elan edib. İttihama görə, V. Zeynalov digərləri ilə korrupsiya şəbəkəsi formalaşdırıblar. Onlar nəzərdə tutulan işlərin bəzi hallarda görülməməsi, məbləğlərin şişirdilməsi və digər yollarla pul mənimsəyiblər.

İttihama münasibət bildirən V. Zeynalov özünü təqsirli bilmədiyini deyib.

Fasilədən sonra dövlət ittihamçısı tərəfindən ittiham aktının elan olunması davam etdirilib. "Bakı Telefon Rabitəsi" İstehsalat Birliyinin baş direktoru Beytulla Hüseynov ona elan olunmuş ittihamla özünü qismən təqsirli bildiyini deyib.

"Rabitə Mülki Tikinti" MMC - nin direktoru, təqsirləndirilən Emin Məmmədovun vəkili Vüqar Xasıyev məhkəmədən ittihamın nəticəvi hissəsinin elan olunmasını xahiş edib: "Eyni rəqəmlər təkrar olunur. Rəqəmləri təkrarlamağın nə xeyri var?"

Hakim vəkilə "xeyri çoxdur" cavabını verib.

"Azintelekom" MMC-nin baş direktoru Cəlil Cəfərovun vəkili Sünbülə Əliyeva isə istintaq materiallarının mətbuatda yayılmasına etiraz edib: "Hökm qanuni qüvvəyə minməyib. Amma mətbuatda geninə-boluna məqalələr yazılır. Bu isə təqsirsizlik prezumpsiyasının pozulması deməkdir".

"Aztelekom" İstehsalat Birliyinin baş direktoru M.Məmmədovun vəkili Şahin Əliyev yerindən replika verib: " İttiham aktını hardansa alıb yazıblar".

Hakim zalda əyləşən mətbuat nümayəndələrinə diqqətli olmağı məsləhət gördü. BTRİB -nin baş mühasibi, təqsirləndirilən Anar Mustafayev ona elan olunmuş ittihamla özünü qismən təqsirli bilib.

"Bakı Rabitə Təmir Tikinti" və “Təmir Təchizat Servis" MMC-lərinin direktoru Bayram Vəliyev də ona elan olunmuş ittihamla özünü qismən təqsirli bilib.

B.Vəliyev ona qarşı qaldırılan 255 min manatlıq mülki iddianı qəbul etdiyini və məbləğin qismən ödənildiyini deyib. "Rabitə Mülki Tikinti" MMC-nin direktoru Emin Məmmədov da ona elan olunmuş ittihamla özünü qismən təqsirli bilib.

"Aztelekom" İstehsalat Birliyinin baş direktoru Məhəmməd Məmmədov ittihamın mahiyyətinin aydın olduğunu, lakin özünü təqsirli bilmədiyini deyib.

"Aztelekom" İstehsalat Birliyinin baş mühasibi, təqsirləndirilən Oqtay Rüstəmov da ona elan olunmuş ittihamlarla özünü təqsirli bilmədiyini deyib.

"Optik Rabitə, Tikinti və Quraşdırma" MMC-nin direktoru Namazalı Məmmədov da həmçinin ona elan olunmuş ittihamla özünü təqsirli bilməyib.

Məhkəmə prosesi noyabrın 28-nə kimi təxirə salınıb.

vidadi zeynalov beytulla huseynov rabite nazirliyi azpolitika azerpoct aztelekomQeyd edək ki, Bakı Telefon Rabitəsi İstehsalat Birliyinin baş direktoru Beytulla Hüseynovun 2009-2015-ci illərdə arvadının təsisçisi olduğu “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, yaxın münasibətlərdə olduğu “3 nömrəli Rabitə Təmir Tikinti”, “Rabitə Mülki Tikinti” MMC-lərinin direktoru Emin Məmmədov və birliyin baş mühasibi Anar Mustafayevlə qabaqcadan əlbir olub yeni rabitə xətlərinin çəkilməsi, binaların, qurğuların təmiri-tikintisi və sair işlərin yerinə yetirilməsi üçün onların hesablaşma hesablarına köçürüləcək pul vəsaitlərinin işlərin həcmindən asılı olaraq 35-45% həcmində hissəsinin nağdlaşdırılaraq B. Hüseynovun özünə verilməsi barədə razılığa gəliblər. B. Hüseynov tabeliyində olan qovşaqların formal olaraq keçirdikləri tenderlərdə vəzifə saxtakarlığı ilə həmin məhdud məsuliyyətli cəmiyyətlərin qalib elan olunaraq müqavilələr bağlanmaqla və faktiki işlərin tam icra olunmadığı halda, o cümlədən internet xidmətinin təmin edilməsi üçün fiber-optik kabel xətlərinin çəkilişi zamanı işlərin faktiki olaraq telefon qovşaqları tərəfindən aparıldığı halda guya həmin işlərin faktiki özünə məxsus olan müəssisələr tərəfindən görülməsi və işlərin həcminin artırılması barədə saxta sənədlərin tərtib edilməsi yolu ilə adıçəkilən MMC-lərin hesabına köçürülmüş ümumilikdə 71 milyon 263 min manat məbləğində vəsaitin 21 milyon 379 min manatını mənimsəməklə dövlətin qanunla qorunan mənafelərinə ağır nəticələrə səbəb olan zərər vurmalarında şübhələr üçün əsaslar müəyyənləşib.

Nazirliyin Aparat rəhbəri Vidadi Zeynalov qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat vəsaitin nağdlaşdırılmaqla mənimsənilməsini və israf edilməsini təşkil etməsində şübhələr üçün əsaslar müəyyənləşib.

Cinayət işi üzrə nazirliyin strukturuna daxil olan “Aztelekom” MMC, “AzİnTelekom” MMC, “Azərpoçt” MMC, Məlumat Hesablama Mərkəzi və özəl şirkət “Optik Rabitə Tikinti və Quraşdırma” MMC-nin fəaliyyətində də mənimsəmə və israf etmə, vəzifə səlahiyyətlərindən sui-istifadə və vəzifə saxtakarlığı faktları müəyyənləşib.

İş üzrə Beytulla Hüseynov, Anar Mustafayev, Emin Məmmədov, Bayram Vəliyevə və “Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin “AzİnTelekom” MMC-nin baş direktoru Cəlil Cəfərova, “Azərpoçt” MMC-nin baş direktoru Qəmbər Bəybalayevə və “Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib.

635x100

Şərhlər

Hər hansısa bir şərh yazılmayıb.

Son yazılar