Sabunçu Rayon Məhkəməsində ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi üzrə məhkəmə prosesi günün ikinci yarısında davam etdirilib.
APA-nın məlumatına görə, Bakı Hərbi Məhkəməsinin sədri Həbib Həsənovun sədrliyi ilə jurnalistlərin iştirakı olmadan keçirilən prosesdə zərərçəkmiş şəxs qismində Akif Çovdarovun qohumu olan Zakir Bədəlov ifadə verib. İstintaq zamanı verdiyi ifadəni təsdiq edən Z. Bədəlovun məhkəmədə verdiyi ifadə ilə istintaq zamanı verdiyi ifadə arasında ziddiyyət yarandığı bildirilib.
Vəkillər onun istintaq zamanı verdiyi ifadənin elan edilməsini istəyiblər. Lakin hakim buna ehtiyac olmadığını deyib. Z. Bədəlov ifadəsində deyib ki, tanışı Tofiq Əliyev ona MTN-nə çağırıldığını deyib və buna görə o, MTN-ə gedib.
Onun ifadəsinə münasibət bildirən Akif Çovdarov isə Z. Bədəlovun nazirliyə çağırıldığını təsdiq edib: "Bizə Gürcüstandan məlumat daxil olmuşdu. Həmin məlumat narkotik qaçaqmalçılığı ilə bağlı idi. Bizə altı nəfərin telefon danışığının dinlənilməsi barədə göstəriş də verilmişdi. Həmin şəxslərdən biri də Zakir Bədəlov olduğu üçün onu nazirliyə dəvət etmişdik. O, həm də bizim uzaq qohumdur və mənimlə görüşmək istəyirdi. Biz onunla söhbət etdik və bu işlə əlaqəsi olmadığı məlum oldu. Zakiri çağırmaqda başqa bir məqsəd isə onu agent kimi işə cəlb etmək idi. Ancaq onun həmin cinayətlə əlaqəsi olmadığı üçün sərbəst buraxdıq və işbirliyimiz də olmadı. Bir müddət sonra bizə verilən məlumat təsdiqini tapdı və cinayətkar dəstə zərərsizləşdirildi".
Proses yanvarın 18-də davam edəcək.
***
Sabunçu Rayon Məhkəməsində ləğv edilmiş MTN-nin generalı Akif Çovdarov və digər 3 nəfərin cinayət işi üzrə növbəti məhkəmə prosesi davam etdirilib.
Musavat.com xəbər verir ki, hakim Həbib Həsənovun sədrliyi ilə keçirilən prosesdə Biləcəri qəsəbəsinin sabiq bələdiyyə sədri İlham Xəlilovun epizodu üzrə şahidlər dindirilib.
Məhkəmdə şahid qismində Natiq Hümbətov ifadə verib. O, Akif Çovdarovla qohum olduğunu deyib.
Şahid bildirib ki, hazırda zərərçəkmiş kimi tanınan İlham Xəlilov A.Çovdarov həbs ediləndən sonra ona müraciət edərək deyib ki, guya A.Çovdarovun təkidi ilə onun adına borc yazdırıb: "Dedi ki, A.Çovdarov onu məcbur edib ki, sənədə qol çəksin ki, guya İlhamın mənə 60 min borcu var. İlhamı iki dəfə Akif müəllimin evində məclis olanda görmüşəm. Akif müəllim İlhamı masanın başında əyləşdirirdi. Münasibətləri o qədər yaxın idi. Akif Çovdarov həbs ediləndə İlham gəlib dedi ki, onun Akif Çovdarova borcu olub, amma rəsmi sənəddə mənim adıma yazılıb. Guya İlhamın mənə 60 min borcu var. Notariusdan ona sənəd verməyimi istədi. Mən də dedim ki, bu, necə ola bilər ki, mənim xəbərim yoxdur? Dedi ki, "sənin xəbərin olmayıb". İlham dedi ki, "əgər borcun yoxdursa, nədən çəkinirsən? Bir sənədi niyə vermək istəmirsən?". Mən də düşündüm ki, bu, Akif müəllimin yaxın dostudur. İstəyirsə, edim. Mən də qəlbində qara qalmasın deyə razılaşdım. Əgər bilsəydim ki, belə bir addım atacaq əlbəttə verməzdim. Mən ona inanmışdım".
A.Çovdarovun vəkili Sadiq Rəsulov bildirib ki, notariusdan məhkəməyə göndərilən arayışda belə bir razılıq sənədinin verilməsi təkzib edilib.
Akif Çovdarovun kürəkəni Rövşən Qasımov da məhkəmədə ifadə verib.
Qeyd edək ki, İlham Xəlilov A.Çovdarovun kürəkəninə 6 sot torpaq səhəsi verdiyini ittihamda qeyd edib. İ.Xəlilov deyib ki, o, A.Çovdarovun təzyiqi və hədə-qorxusu ilə torpaq sahəsini Rövşən Qasımova verib.
Deyilənlərin yalan olduğunu söyləyən Rövşən Qasımov məhkəmədə bunları deyib: "İlhamdan torpaq sahəsi almaq istəməyim doğrudur. Amma bunun Akif Çovdarov vasitəsi ilə alınması və təzyiqlərin olması yalandır. Torpaq sahəsi alınan ərəfədə sənədlərdə problem var idi və torpağı bəyənmədim. Mən atamgil üçün bağ evi tikdirmək istəyirdim. Amma həmin ərazidə yaşıllığın olduğunu gördük. Orada tikinti aparmaq mümkün deyildi. Bu işi görmədik. Sonra Akif Çovdarov həbs ediləndə İlham zəng elədi ki, bu işlə bağlı Biləcəri bələdiyyəsində də yoxlamalar başlayıb. O, xahiş etdi ki, o vaxt ona verdiyi sənədləri qaytarım. Mən də sənədləri geri qaytardım. Əgər torpaq mənim adıma olsa idi, niyə qaytarardım?"
İlham Xəlilov isə deyib ki, A.Çovdarovun kürəkəninin adına olan torpaq sahəsi ilə bağlı çıxarış olub. A.Çovdarovun vəkilləri isə belə bir çıxarışın olmasını təkzib ediblər.
Məhkəmədə digər sabiq bələdiyyə sədri Elman Salmanov da İlham Xəlilovla bağlı əlavə ifadə verib. Keçmiş Binəqədi bələdiyyəsinin sədri Elman Salmanov deyib ki, İlham Xəlilov ondan A.Çovdarova vermək adı ilə əlavə 16 min manat da alıb.
Vəkil Sadiq Rəsulovun sözlərinə görə, sabiq bələdiyyə sədri Elman Salmanov məhkəmədə bunları deyib:"Bunu istintaqda da dedim ki, İlham məndən əlavə 16 min də alıb. Amma bunlar yazılmadı. İlham Xəlilov məndən A.Çovdarova vermək adı ilə 150 mindən əlavə 16 min də aldı. O, dedi ki, Novxanıda Akif Çovdarova tikilən bağ evinin birinci mərtəbəsini mən tikdirməliyəm. Qalan mərtəbələrini də İlham Xəlilov özü tikdirəcəyini dedi. Məndən bu adla 16 min də aldı. Bu pulu da hissə-hissə alıb. Qum, taxta və digər matüriallar üçün..."
Sadiq Rəsulovun dediyinə görə, məhkəmədə məlum olub ki, A.Çovdarov bağını həmin vaxt tikdirməyib. İlham Xəlilov Elman Salmanovdan 2008-də pul alıb ki, A.Çovdarov Novxanıda bağ evi tikib.
"Amma A.Çovdarov dedi ki, bağ evinin inşasını 2005-ci ildə bitirib" - deyə S.Rəsulov bildirib.
Məhkəmədə Binəqədi bələdiyyəsinin sabiq sədri Elman Salmanov ona dəymiş zərəri ilk olaraq İlham Xəlilovdan istədiyini söyləyib.
S.Rəsulov əlavə edib ki, Elman Salmanov ifadəsində qeyd edib ki, A.Çovdarov həbs ediləndə o, İlham Xəlilova müraciət edib və pulunun generaldan alınaraq geri qaytarılmasını istəyib: "Amma İlham ona təklif edib ki, birlikdə A.Çovdarova qarşı ifadə versinlər. İlham Xəlilov Elman Salmanova deyib ki, "sən mənim dediklərimin əksini dedikdə mənim ifadəm şübhə altına düşür. Sənə 10 sot torpaq təklif edirəm. Məm deyən şəkildə ifadə ver". İlham bunun üçün Elmana pul da təklif edib. Amma o, bunu qəbul etməyib. Elman məhkəmədə onu da söylədi ki, İlhamın dediklərinin yalan olduğunu məhkəmədə başa düşüb".
Məhkəmədə Akif Çovdarov da deyilənlərə münasibət bildirib. Vəkilin sözlərinə görə, A.Çovdarov istintaqdan narazılığını bildirərək bunları söyləyib: "Narazılığım budur ki, belə yalançı, şərəfiz adamları generallarla üz-üzə qoyublar. Onlara generallara qarşı ifadə verdirirlər".
Bildirək ki, A.Çovdarovla birlikdə müttəhimlər kürsüsünə ləğv edilmiş MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanov da çıxarılıb.
Qeyd edək ki, təqsirləndirilən şəxslər - Akif Çovdarova Cinayət Məcəlləsinin 145.3 (Qanunsuz azadlıqdan məhrumetmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israfetmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədilə törədildikdə), 182.3.1, 182.3.2 (Hədə-qorxu ilə tələbetmə külli miqdarda əmlak əldə etmək məqsədilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri, Səlim Məmmədova həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri, Akif Əliyevə həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri və Orxan Osmanova isə həmin Məcəllənin 145.3, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 341.2.1, 341.2.2 və 341.2.3-cü maddələri ilə yekun ittihamlar irəli sürülüb.
Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.
Sabunçu Rayon Məhkəməsində ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi üzrə məhkəmə prosesi günün ikinci yarısında davam etdirilib. 
Şərhlər
Hər hansısa bir şərh yazılmayıb.