DEPUTAT DƏBDƏBƏLİ VİLLADAN ÇIXDI, MAAŞLARI KƏSDİ - Açıqlama (YENİLƏNİB)

Azərbaycan Demokratik İslahatlar Partiyasının sədri, deputat Asim Mollazadə Nəsimi rayonunda yerləşən ofisindən çıxmaq məcburiyyətində qalıb.

“BakıPost”un xəbərinə görə, Asim Mollazadənin 10 ildən artıq bir müddətdə qaldığı ofis-villadan çıxmasına səbəb maliyyə çatışmazlıqları olub. Hətta, partiyanın qərargahında çalışan işçilərin maaşları da kəsilib.

Modern. az saytı Asim Mollazadə ilə əlaqə saxlayıb. Deputat bildirib ki, heç də ofisdən çıxmasının səbəbi maliyyə çatışmazlıqları deyil.

“Nəsimi rayonunda ofis axtarışındayıq. Yaxın müddət ərzində yeni ofisə köçəcəyik. Yeni binada məskunlaşacağıq. Burada əsas səbəb maliyyə çatışmazlıqları deyil.. Burada əsas səbəb ofisin bizi qane etməməsidir”.

Asim Mollazadə işçilərin əmək haqlarının kəsilməsinə də aydınlıq gətirib.

“İşçilərin əmək haqlarının kəsilməsi xəbərləri tamamilə qeyri-dəqiq məlumatdır. Partiyada çalışanların əksəriyyəti könüllü çalışanlardır. Hansısa formada maaşların kəsilməsindən söhbət gedə bilməz. Maaş alanlar öz əmək haqlarını almaqda davam edəcəklər”.

* * *

Azərbaycan Demokratik İslahatlar Partiyasının sədri, millət vəkili Asim Mollazadə maliyyə çətinlikəri ilə üzləşib.

BakiPost.az-a daxil olan məlumata görə, deputat partiya üçün kirayə götürdüyü, Nəsimi rayonu, Sabit Rəhman küçəsi 7 ünvanında yerləşən dəbdəbəli villadan çıxmaq məcburiyyətində qalıb.

A.Mollazadənin 10 ildən artıq bir müddətdə qərarlaşdığı ofis-villadan çıxmasına səbəb kimi ciddi maliyyə çatışmazlıqlarının olduğu bildirilir. Məlumata görə, o, partiyanın qərargahında çalışanların maaşlarını tamamilə kəsib, maliyyələşdirdiyi bəzi layihələrdən imtina edib. Hazırda ADİP-də anlaşılmaz bir vəziyyət hökm sürür.

Əldə etdiyimiz məlumata görə, partiya sədri, deputat seçildiyi Nəsimi rayonu ərazisində daha uyğun qiymətə kiçik ofis axtarışındadır.

Məsələ ilə bağlı millət vəkilinin mövqeyini öyrənmək istəsək də, telefon zənglərimizə cavab vermədi.