Sui-qəsd və 4,6 milyonluq dələduzluq ittihamı - Arif Alışanovun şəriki həbs edildi 

"Azərbaycan Televiziya və Radio Verilişləri” QSC-nin sədri Arif Alışanovun biznes ortağı Şücayət Əkbərov indi sui-qəsd suçlaması ilə həbs olunub.

Musavat.com xəbər verir ki, 2017-ci ilin yanvarından həbsdə olan Ş.Əkbərov əmlakını ələ keçirmək məqsədi ilə AzTV rəhbərini öldürməyə cəhddə və dələduzluqda ittiham edilir. İddiaya görə o, A.Alışanovun 4 milyon 641 min manatını ələ keçirib.

Şücayət Əkbərov isə ittihamları rədd edir. O, A.Alışanovu öldürmək istəməsi, həm də onun pulunu ələ keçirməsi haqda ittihamları əsassız hedab edir. O, sifarişlə həbs olunduğunu, özünə və ailəsinə məxsus əmlakın zorla əlindən alındığını bildirir.

Şücayət Əkbərovun keçmiş həyat yoldaşı Səlimə Sadıqova da əmlaklarının zorla əllərindən alınması ilə əlaqədar məhkəmədə iddia qaldırıb. İddiaya Nərimanov Rayon Məhkəməsində hakim Ramil Quliyev baxır. Cavabdeh qismində isə AzTV sədrinin bacısı qızı Nilüfər Cəfərova və A.Alışanovun işçisi Camal Nəbiyev tanınıb.

Bu iş üzrə məhkəmənin hazırlıq iclasında hakim iddianı təmin etmə tədbiri kimi, mübahisəli əmlakın (Səlimə Sadıqovanın əllərindən zorla alınaraq A.Alışanovun bacısı qızının mülkiyyətinə keçirildiyini iddia etdiyi əmlak) üzərinə həbs qoyulması haqda qərardad çıxarıb. Cavabdeh tərəf bu qərardan Bakı Apellyasiya Məhkəməsinə şikayət verib. Bu səbəbdən Nərimanov Rayon Məhkəməsində iddiaya baxılması apellyasiya şikayətinin nəticəsi bəlli olana qədər təxirə salınıb. Cavabdeh tərəfin nümayəndəsi Arif Alışanovun vəkili Zaur Abbasovdur.

Bildirək ki, Səlimə Sadıqova iddia ərizəsində yazır ki, Şücayət Əkbərovla boşanandan sonra əmlakın bir hissəsi qanuni yolla ona verilib. Şücayət Əkbərovun həbsindən sonra Arif Alışanov onun əmlaklarını da əlindən alıb: "Həyat yoldaşımın həbsindən bir neçə gün sonra bizi məcburi şəkildə polis idarəsinə apardılar. İdarəyə notarius gəldi və mənə məcburi şəkildə Arif Alışanovun işçisi, heç vaxt tanımadığım Camal Nəbiyevin adına baş etibarnamə yazdırdılar. Məni hədə-qorxu, zorakılıqla həmin etibarnaməyə imza atmağa məcbur etdilər. Bu, 24 yanvar 2017-ci ildə oldu. Həmin etibarnamə əsasında da iki gün sonra – yanvarın 26-da mənə məxsus əmlak Arif Alışanovun bacısı qızı Nilüfər Cəfərovanın adına keçirilib. Şamaxı rayonunun Çuxuryurd kəndində yerləşən, mənə məxsus 6,5429 hektar torpaq sahəsi guya ona 25 min manata satılıb. Əvvəla, rəsmi rəydən də görünür ki, bu torpaq sahəsinin dəyəri 65 min manatdır. Ən əsası, həmin müqavilə üzrə mən pul almamışam, ümumiliyyətlə, bu əmlakın satılması mənim iradəmdən kənar baş verib. Fevralın 13-də isə Camal Nəbiyev Nilüfər Cəfərova ilə başqa bir alqı-satqı müqaviləsi bağlayıb. Bu dəfə Şamaxı rayonu, Nağaraxana kəndində mənə məxsus 194,4 kvadratmertlik ev və 0,11 hektar torpaq sahəsi 28 min manata guya Arif Alışanovun bacısı qızının adına keçirilib. Samux şəhərində yerləşən, mənə məxsus 1.246 hektar torpaq sahəsi yenə də Nilüfər Cəfərovanın mülkiyyətinə verilib. Yenə də Samux şəhərində 0,08 hektar torpaq sahəsi və həmin ərazidə 200.6 kvadratmetrlik yaşayış evi olan əmlakım da Nilüfər Cəfərovanın mülkiyyətinə verilib”.

İddiaçı əlavə edir ki, dörd müqavilənin hamısı formal bağlanıb, əslində, həmin əmlaklar əvəzsiz olaraq, Arif Alışanovun mülkiyyətinə verilib: "Bir daha qeyd edirəm, o əmlakları satmaq niyyətim olmayıb, onlar məndən zorla alınıb”.

Səlimə Sadıqova baş etibarnamənin ona qanunsuz yolla imzalatdırıldığını vurğulayaraq, etibarsız hesab olunmasını, onun əsasında bağlanmış alqı-satqı müqavilələrinin də ləğv olunmasını məhkəmədən xahiş edib.

Qarşı tərəf isə iddiada göstərilənlərlə razılaşmır. Bildirir ki, Sadıqova könüllü şəkildə etibarnaməni imzalayıb, əmlaklar da qanuna uyğun şəkildə özgəninkiləşdirilib.