Azərbaycan antaqonizmi – Hökumət və hakimiyyətin «mənbəyi»

Dərc olunub: 25/11/2017 - 00:16

«Çiynini aşağı endir… küsdərəcik»

mirzeMirzə AĞ

Biri var idi, biri yox idi – bir Əli Həsənov adlı-soyadlı «qaçqınkom naziri» var idi… və o, yenə gündəmə gəldi – nəvəsinin sayəsində…

Nəvəsi harınlamasaydı, bahalı maşını ilə vurub adam öldürməsəydi və bu olay faş olmasaydı, faş olduğu qədər də onu tutub mühakimə etməsəydilər, nəvə də məhkəmədə «işləməmişəm, hərbi xidmətdə olmamışam…» – deyə, etiraf yapmasaydı, Əli Həsənov (bundan sonra onu obrazlı olaraq, «Əlhəsən» adlandıracam) heç kimin yadına düşəsi deyildi – dözümlü xalq artıq onu unutmuşdu…

Əlhəsən gündəmə gələn kimi, onun məşhur «nəsihət»ləri də yada düşdü. Məsələn, «adambasma» olayından bir müddət əvvəl Əlhəsən belə bir ağzıgöyçəklik yapmışdı:

“Bu gün elə dövrə gəlib çatmışıq ki, yalnız milli ruhda böyümək kifayət etmir. 2014-cü ildə məcburi köçkün uşaqlarının hərbi təhsil alması ilə bağlı araşdırma apardıq və nəticədə xoşagəlməz mənzərə ilə qarşılaşdıq. Bütün işğal olunmuş rayonlardan hərbi ali məktəblərdə cəmi 30 gənc təhsil alırdı. Bu barədə prezidentə məruzə edərək nəticələrin aradan qaldırmaq üçün icazə istədik. Təhsil Nazirliyi ilə birlikdə görüş keçirildi. Hətta məcburi köçkün ailələrinə müraciət etdim ki, hərbi xidmətdə olmayan və fərarilik edənlərə qız verməyin. Sənin torpaqların işğal olunubsa və sən hərbi təhsil almaq istəməyib fərarilik edirsənsə, bu, yolverilməzdir. Türkiyədə vətənpərvərlik sevgisi çox böyükdür. Odur ki, gözəl nümunə yanımızdadır. Bu gün ölkədə fərariliyin səviyyəsi aşağı düşüb. Ən qeyrətli və vicdanlı oğullarımız şəhid olur”.

«Adambasan» nəvənin məhkəməyə verdiyi ifadə açıb göstərdi ki, cənab Əlhəsən yuxarıdakı fikirləri səsləndirərkən, yumşaq desək, bir balaca riyakarlıq edib. Məsələn, fərari elə onun öz ocağının başında oturubmuş, canım sənə desin, müharibədə də bu «rəsul»un heç bir qohumu-əqrəbası şəhid olmayıb, üstəlik də nəinki sıravi bəndə, hətta Azərbaycan generalı öz qızının «həri»sini bu fərariyə bircə kəlməyə, «qurbanlıq» edib.
Məhkəmə göstərdi ki, «adambasan nəvə» həm də qəza törədənə qədər heç yerdə işləməyib. Bəs, 3 milyonluq maşınları hansı pullarla alıb? Şübhəsiz ki, babasının pulları ilə. İndi Allahqulu soruşur: Bəs, baba 3 milyonu haradan alıb? Şahqulu da cavab verir ki, baba pulları sadəcə, oğurlayıb! Deməli, «qaçqınkom naziri» OĞRUDUR!..

Əlhəsən elə demişdi, mən də belə deyirəm: «Artur hökuməti» idarəçiliyinin elə bir mərhələsinə gəlib çatmışıq ki, hakimiyyət adından çıxış edən nazirlər, harın məmurlar və oğru oliqarxlar xalqı, obrazlı desək, «hakimiyyətin mənbəyi»ni minib çapırlar, ölkənin sərvətini amansızcasına talan edirlər, kasıb-kusuba divan tuturlar!

Əlhəsən də onlardan biri… Fəqət, onu dəyişməklə, vəziyət düzələsi deyil. Çünki hakimiyyətin mənbəyinə hakimiyyətin belə yad münasibəti «Artur hökuməti»nin mahiyyətindən qaynaqlanır. Məhz bu səbəbdən dolayı «Artur hökuməti»nin iki anlayışdan heç xoşu gəlmir: biri «vətəndaş», digəri isə «istehlakçı» kəlməsidir. Nədən ki, bu kəlmələr hakimiyyətin mahiyyəti ilə antaqonizm təşkil etdiyi qədər də «Artur hökuməti» bu kəlmələrdən QORXUR!

Bu hökumət Azərbaycan əhalisinin şəxsində «təbəə»ni, istehlakçının şəxsində isə «passiv alıcı»nı görür…

Heç təsadüfi deyil ki, hələ 2008-ci ildə «Atur hökuməti»nin baş ideoloqu yazmışdı ki, çağdaş Azərbaycan cəmiyyəti iki zümrəyə bölünüb və onların arasında mübarizə gedir. Onlardan biri – «irodçu»lardır, digəri isə «zelotlardır». Açması belədir: hakimiyyət başında olanlar irodçular, zülmə düçar edilənlər, haqqı yeyilənlər, hakimiyyət yaratmaq haqqı «zorlananlar» isə «zelot»lardır (İrod – öz xalqına qənim kəsilmiş qədim yəhudi çarıdır).

Belədə, Əlhəsəni və ya ayrı-ayrılıqda bəzi yabançı-səbatsız (vicdansız!) nazir-məmurları şaqqalasan da ölkədə vəziyyət yaxşıya doğru dəyişməyəcək…

Bütün bunların davam etməsində «hakimiyyətin mənbəyi»nin də öz günah payı var – sonsuz passiv və ifrat «dözümlü»dür. 

Bu kütlə hadisədən-hadisəyə coşur, elə o saat da «buza dönüb» boş kafasını aşağı salır – necə deyərlər, «başını aşağı salıb, işini görür»…

Nə qədər ki, Azərbaycan insanı Azərbaycan vətəndaşına, müştəri (alıcı) istehlakçıya çevrilməyib, o qədər də Artur, «Əlhəsən» və sairə kimilər nazir-məmur olub da Şərq nağıllarındakı Sindbad kimi toplumun çiynindən düşməyəcək və «çiynini aşağı endir, minim səni, küsdərəcik» – deyərək, bizlərlə məzə qılacaqlar…

Mən isə deyirəm: Ya çiynini aşağı endir, ya da səsini qaldır, küsdərəcik…


loading...




Fikrinizi bildirin