"Əlilləri işə götürmürlər" - Səlim Müslümov
"Hazırda əlilliyi olan şəxslərin işlə təminatında, işə götürülməsində müəyyən problemlər ortaya çıxır".
Bunu əmək və əhalini sosial müdafiəsi naziri Səlim Müslümov bildirib.
Onun sözlərinə görə, bu problemlərin müəyyən səbəbləri var: "Əlilliyi olan şəxsləri işəgötürənlər bir sıra səbəbdən işə götürmürlər. Birincisi, onlarda belə bir qənaət formalaşıb ki, əlilliyi olan şəxslərin digərləri ilə müqayisədə məhsuldarlığı aşağıdır. İkincisi və ən vacib məqamlardan biri odur ki, onların işlə təminatı üçün əlavə xərc çəkməyə işəgötürənlərin həvəsi yoxdur. Yəni əlilliyi olan şəxslərin işlə təmin olunması üçün həmin iş yerlərinin əlilliyi olan şəxslərə uyğunlaşdırılması lazımdır. Bunun üçün müəyyən qədər xərc çəkilməlidir. İşəgötürənlər bu xərclərin çəkilməsinə həvəslə getmirlər. Əlilliyi olan şəxslərin təhsil səviyyəsi, peşə hazırlığı səviyyəsi cəmiyyətin digər üzvlərinə nisbətən müəyyən qədər aşağıdır. Belə halda işəgötürənlər əlilliyi olan şəxslərin işə götürülməsində bunları əsas gətirərək müəyyən neqativ elementlərə yol verirlər. Əlilliyi olan şəxslərin iş tapmasında təhsilləri ilə bərabər, onların əlilliyinin növü də rol oynayır. Eyni zamanda onların əlilliyinin hansı yaşda baş verməsi də rol oynayır. Əlilliyi olan şəxslərin işlə təmin olunmasında biz cəmiyyət olaraq müəyyən dəyişikliyə getməliyik".
ƏLİLLƏRİN 10%-İ İŞLƏYİR
"Azərbaycanda əlilliyi olan 624 min şəxsin təxminən 3 min nəfəri əmək qabiliyyətlidir. Onların isə 10 faizə yaxını işləyir".
Bunu əmək və əhalinin sosial müdafiəsi naziri Səlim Müslümov "Əlilliyi olan şəxslərin məşğulluq imkanlarının artırılmasına dəstək" layihəsinin təqdimatında deyib.
O bildirib ki, əlillərin məşğulluğunun təmin edilməsi əmək bazarının onlar üçün uyğunlaşdırılmasından asılıdır və bunun üçün qanunvericiliyin təkmilləşdirilməsi vacibdir: "Əlillərin hüquqlarının müdafiəsi haqqında yeni qanun layihəsi hazırlanıb. Qanun layihəsi artıq Nazirlər Kabineti tərəfindən Prezident Administrasiyasına təqdim olunub".
Nazir deyib ki, BP şirkəti "Əlilliyi olan şəxslərin məşğulluq imkanlarının artırılmasına dəstək" layihəsi üzrə bir ildə 100 nəfər əlilliyi olan şəxsin xüsusi peşəyə, təhsilə yiyələnməsi öhdəliyini üzərinə götürür: "Şirkət bunun üçün 488 min manat vəsait ayıracaq". /APA, Report
Son yazılar
Şərhlər
Müharibə əlillərini işə götürmək nədir,idarələrin qapısından qovurlar.Heç bir sahədə imtiyazı yoxdur.Azərbaycan yeganə ölkədir ki,əlillər cərimə ödəyir.Adi həkim növbəsində belə saymırlar.Tək ayağı üstə zorla dayananı həkim növbəsiz qəbul etmir.Bütün bunlar isə işğal edilmiş ərazilərimizin azad oluinmasında dövlətimizin marağının olmamasını göstərir."rusun ayaqyolusunu təmizləyənlərin" imtiyazı həyatını Vətən uğrunda verənlərdən çoxdur.Vətənpərvərlik bunamı deyirik?
Elilleri. Ay mellim ne vaxt salamat adamları işe götürdüler ki,elilleride götürsünler?Senin hakimiyyetinin meğzi budu.