Bu gün Dünya Azərbaycanlılarının Həmrəyliyi Günüdür
Bu gün Dünya Azərbaycanlılarının Həmrəyliyi Günüdür.
“Report”un məlumatına görə, bu bayram ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır. Dünya Azərbaycanlılarının Həmrəyliyi Gününün qeyd edilməsi artıq bütün dünya azərbaycanlıları üçün zərurətə və mənəvi ehtiyaca çevrilib.
Azərbaycanlıların yaşadıqları, fəaliyyət göstərdikləri və çoxluq təşkil etdikləri Avropa ölkələrində bu tendensiya özünü yüksək səviyyədə göstərir. Bu da ondan irəli gəlir ki, Avropadakı Azərbaycan diaspor təşkilatları öz qüvvələrini səfərbər etməkdə ardıcıldırlar və bu, ayrı-ayrı cəmiyyət üzvləri üçün bir araya gəlmək, cəmiyyət və qurumlar halında birləşmək baxımından dünyanın sivil nöqtələrindən biri olan Avropada mühüm əhəmiyyət kəsb edir.
Dünya Azərbaycanlılarının Həmrəyliyi Gününü dünyanın 70-dən çox ölkəsində yaşayan azərbaycanlılar bayram kimi qeyd edir. Bu gün Azərbaycan diasporu üçün ən mühüm bayrama çevrilib, Yeni İl isə ikinci plana keçib. Dünya Azərbaycanlılarının Həmrəyliyi Gününü hətta milliyyətcə azərbaycanlı olmayıb, lakin Azərbaycanda doğulub böyümüş, Azərbaycan əsilli diaspor nümayəndələri də qeyd edirlər.
Azərbaycanlılar minilliklər boyu özlərinin doğma torpağı olan tarixi Azərbaycan ərazisində yaşayaraq dünya sivilizasiyasına böyük töhfələr veriblər. Müharibələr, inqilablar, hərbi münaqişələr, dünyada gedən müxtəlif ictimai-siyasi proseslər nəticəsində Azərbaycan parçalanmış, azərbaycanlıların bir qismi öz yurd-yuvalarından didərgin salınmış, deportasiyalara məruz qalmış, bir-birindən ayrı düşmüşdür. İş tapmaq, təhsil almaq məqsədilə doğma yurdu tərk edərək başqa ölkələrdə qərar tutub yaşayan azərbaycanlılar da var. Beləliklə də azərbaycanlılar tarixi Azərbaycan torpaqlarından bütün dünyaya yayılıblar. Rusiyada, Ukraynada, Müstəqil Dövlətlər Birliyinin (MDB) digər ölkələrində, Baltikyanı ölkələrdə, Avropada, Amerikada, Şərq ölkələrində iri Azərbaycan icmaları yaranıb.
Dünya Azərbaycanlılarının Həmrəyliyi Gününün əsası 1989-cu il dekabrın axırlarında Naxçıvanda sərhədlərin (SSRİ-İran sərhədləri) dağılması zamanı qoyulub. Şimali və Cənubi Azərbaycan arasındakı sərhəd dirəkləri dağıdılıb. Bu vaxt İstanbulda türkdilli xalqların konfransı keçirilirdi. Konfrans da dünya azərbaycanlılarının həmrəyliyinin qeyd olunmasına qərar verib. 1991-ci ilin 16 dekabrında Azərbaycan xalqınının ümummilli lideri, o vaxt Naxçıvan Muxtar Respublikası Ali Məclisinin sədri vəzifəsində çalışan Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəyliyi Günü elan edib. Beləliklə, bütün azərbaycanlılar üçün əziz olan 31 dekabr - Dünya Azərbaycanlılarının Həmrəyliyi Günü bayram edilir. Azərbaycanlılar bu gün ilə fəxr edir və onu qürurla qeyd edirlər.
Şərhlər
Azərbaycanda həmrəylik yoxdursa,dünyadakı azərbaycanlılar necə həmrəy ola bilərlər?Qonşu qonşuynan,qohum qohumnan,qardaş qardaşnan həmrəy deyil bu xarabada.Şəxsən mənimçün dekabrın 31-i Yeni il bayramıdı,başqa heç nə bilmirəm.Yaxşı yeyib içib,rus və türk kanallarına baxacağam və səhərə yaxın da başımı atıb yatacağam.Vəssalam.Nə həmrəylik,nə dünya?Nəinki dünya azərbaycanlıları,heç yerli azərbaycanlılar belə mənimlə maraqlanıbmı ki,ay yoldaş dadaşyev,ölmüsənmi,qalmısanmı,nə lazımdı,nə qulluq eliyək?
Bu gün həmrəylik cənubi Azərbaycanda baş verən prosesslərə dəstək olmaq deməkdir. Təəssüflər olsun ki, bu gün şimali Azərbaycan yatır. Qalxmalıyıq ki, qalxanların ayaqları altında qalmayaq.
Men büdün azerbaycanın televizya rehberlerne demek isteyiremki bayram günlerinde heyder eliyevin şeklini kanallardan yıgışdırın. menimde ulu öndere hörmetim böyükdür ancaq ele qonşu rusya alimleri bizi tenqid edirki bes hanı azerbaycan ücün heyatınnan gecen şah ismayıl xetayi memmed emin resulzade neriman nerimanov ve mircefer bagırov bunlarda heyder eliyevden gerde dahiler olmayıb olar niye anılmır ve şekli televizyada yoxdu odurki öznüzü xarice güldülmeyin yene deyirem ulu öndere sevgim ebedidi odurki bu dahilerede hörmet qoyulmalıdır