BOKS ÜZRƏ ÇEMPİONATDA RƏZALƏT - Rəisin qardaşı oğlu 1 gün sonra qalib edildi (VİDEO)

Boks üzrə Azərbaycan çempionatında 64 kq çəki dərəcəsində Elməddin İsmayılovla İxtiyar Qazıbəyov arasında keçirilmiş 1/4 final görüşünün nəticəsi ləğv olunub. Bu barədə "Report"a İsmayılovun özü məlumat verib.

Elməddin İsmayılov bildirib ki, Qazıbəyova qalib gəlsə də, ertəsi gün qərar dəyişdirilib. Halbuki, qarşılaşmadan sonra rinq hakimi onun əlini havaya qaldırıb. Ertəsi gün gənc boksçu Elvin İsayevlə yarımfinal döyüşünə gəldiyi vaxt ona növbəti mərhələyə Qazıbəyovun yüksəldiyi deyilib.

Bundan narazı qalan İsmayılov haqsızlıqla üzləşdiyini iddia edib: "Mən əslən Xocalıdanam. Kasıb ailədə böyümüşük. İxtiyar Qazıbəyovun əmisi Eldar Qazıbəyov isə polis rəisidir. Belə ədalətsizlik olmaz. Hamının gözü qarşısında qalib olsam da, "torbamı tikdilər". Şikayət etdik, amma xeyri olmadı".

Öz növbəsində, Azərbaycan Boks Federasiyasının baş katibi Nağı Səfərov qalibin adının ertəsi gün dəyişdirilməsində qeyri-adi bir şey olmadığını bildirib. Onun sözlərinə görə, Beynəlxalq Boks Federasiyasının (AİBA) yeni qaydalarına əsasən, 1/4 final görüşündən sonra Qazıbəyov etiraz məktubu yazıb. Ertəsi gün isə mütəxəssislər görüntülərə baxaraq hakimin qərarını dəyişdiriblər: "Bu, Azərbaycan çempionatında ilk belə hal deyil. Daha 3 döyüşün nəticəsi dəyişdirilib. O cümlədən Qazıbəyovun yarımfinalda Elvin İsayevlə keçirdiyi görüşdən sonra bu cür hal yaşandı. İsayevin etirazına baxıldı və o, qalib elan olundu. Bu gün isə Elvin ölkə çempionu adını qazandı. Bütün etirazlara 1/4 final döyüşlərinin ertəsi günü baxıldı. Sadəcə, İsmayılov və Qazıbəyova deyildi ki, gözləsinlər, kim qalib gəlsə, o, yarımfinal döyüşü üçün tərəziyə çıxsın. Məhz buna görə hər ikisi çağırılmışdı".

Səfərov İxtiyar Qazıbəyovun Elməddin İsmayılovla döyüşün ertəsi günü əmisinə görə qalib elan olunduğuna dair iddialara da münasibət bildirib: "Kiminsə qohumu polis rəisidirsə, biz nə edə bilərik? Döyüşün diski var. İstəyən adam gəlib mütəxəssislərlə baxıb rəy verə bilər. Baxdılar və rəy verdilər ki, Qazıbəyov qalibdir. Yarımfinal görüşündə isə Qazıbəyova qələbə verilsə də, diskə baxıldıqdan sonra Elvin İsayev qalib elan olundu. Təbii ki, uduzan tərəf qərarla heç vaxt razılaşmır. Lakin bu, yeni qaydadır və artıq bütün səviyyədən olan yarışlara şamil olunur. 2016-cı il Rio-de-Janeyro Yay Olimpiya Oyunlarında isə boksçumuz Lorentso Sotomayora finalda haqsızlıq edildiyi halda, şikayətimizə baxılmamışdı".

Qeyd edək ki, Eldar Qazıbəyov Yasamal Rayon Polis İdarəsinin 28-ci Polis Bölməsinin rəisidir.

635x100

Şərhlər

ali 2018-01-31 20:00:55

Eldar Qazıbəyov haranin rəisisisinizsə bilmirəm bəllidir ki, iddialarıniz rəisliyin verdiyi imkanlarla dozanızı təmin etmir və vəzifənin verə bilmədiyi tələbi boksda (yəni İDMANDA) axtarırsiniz......

Son yazılar