Şəmkirdə təcili tibbi yardım maşını qəzaya uğrayıb, xəsarət alanlar var

Şəmkirdə təcili tibbi yardım maşını qəzaya uğrayıb.

"Report"un Qərb bürosunun məlumatına görə, rayonun Keçili kəndində baş vermiş yarımçıq tikilidə baş vermiş partlayış nəticəsində yanıq xəsarəti alan 27 yaşlı Tural Məmmədovu Şəmkir rayon Mərkəzi Xəstəxanasına aparan Səhiyyə Nazirliyinə məxsus "Mercedes" markalı təcili tibbi yardım maşını qəzaya uğrayıb.

Belə ki, yüksək sürətlə hərəkətdə olan, sürücü Qəmbər Xanməmmədovun idarə etdiyi təcili yardım maşınının qarşısına əks tərəfdən gələn digər avtomobil çıxıb. Nəticədə təcili yardım maşını həmin avtomobillə toqquşub.

Qəza zamanı hər iki avtomobilin sürücüsüsü yümgül xəsarət alıb. Eyni zamanda Şəmkir rayon Təcili Tibbi Yardım Stansiyasının həkimi Tunzalə Hüseynova da qolundan və bilək nahiyəsindən xəsarət alıb.

Qəza zamanı habelə təcili yardım maşınına ciddi ziyan dəyib.

Qeyd edək ki, yanıq xəsarəti alan T. Məmmədov isə avtomobil qəzası nəticəsində heç bir xəsarət almayıb və o, Bakı şəhər Mərkəzi Yanıq Xəstəxanasına göndərilib. Onun vəziyyətinin isə ağır olaraq qaldığı bildirilir. Faktla bağlı araşdırma aparılır.

Xatırladaq ki, Şəmkir rayonu, Keçili kəndində ümumi sahəsi 20 m2 olan köməkçi tikilidə (hal-hazırda təmir işləri aparılır) yanğınla nəticələnən partlayış baş verib.

"Report" FHN-ə istinadən xəbər verir ki, hadisə zamanı tikilinin pəncərə şüşələri sınıb, divarları qarsalanıb və tikiliyə bitişik yığılmış 16 ton ot bağlamasının 4 tonu yanıb. Partlayış zamanı evdə olan 1 nəfər müxtəlif yanıq xəsarətləri alıb.