Gəl gedək
Nurəddin İsmayıl
Gəl gedək, canım-gözüm,
Gedək,
könüllərin sıxılmayan yerinə.
Qapısından içəri
kimsənin girmədiyi,
insanın insandan hələ
söz alıb
söz vermədiyi,
hər şeyin ilkini olan yerinə.
Gedək,
könüllərin sıxılmayan yerinə.
Nə işimiz var
hamının gözü olan bu şəhərdə.
Bizim işimiz şəhərlik deyil,
Gedək,
çiçəklər üstünə təzə şeh salan
səhərlərin
dan şəfəqli üzünə.
Gedək,
qoy bilsinlər
sevgisi dalana dirənən
bu şəhərin
astarı nə, üzü nə.
Gedək,
könüllərin sıxılmayan yerinə.
Gəl gedək, canım-gözüm,
Gecədən səhərə
süd yolu açan
ay işığına sarı.
Gedək,
sevgisi sularla oynaşan
günəşin
bizi tamaşaya səsləyən
ayna tək göz qaytardığı
yaraşığına sarı.
Gedək,
iz düşməmiş hələ
təmiz sevgilər izinə,
Gedək ,
könüllərin sıxılmayan yerinə.
Üz qoyaq,
küləklər yanağını sığallayan
yaşıl otlar üzünə.
Baxaq,
bizə göydən
göz-qaş atan ulduzların
çiçək-çiçək gözünə.
Gedək,
quş qanadlı arzularla,
göydən
yaşıl işıq sevgi payımızı alaq.
Əl götürək
üzünün suyu tökülmüş yerdən,
Yolumuzu
telləri ağlı qırmızılı,
nur selindən hörülmüş
qövsi-qüzehdən salaq.
Əvvəl gözəl
Bizdən əvvəl əvvəl vardı,
Əvvəl gözəl, əvvəl gözəl.
Nə ayrılıq, hicran vardı,
Əvvəl gözəl, əvvəl gözəl.
Düşdük eşqin sevdasına,
Könül verdik Leylasına,
Fanidir, uyma fənasına,
Əvvəl gözəl, əvvəl gözəl.
Ətəkdən üzülüb gəldik,
Pətəkdən süzülüb gəldik,
Getməyə düzülüb gəldik,
Əvvəl gözəl, əvvəl gözəl.
Ruhum bədənə calandı,
Atəşə, oda qalandı,
Sındı, könüllər talandı,
Əvvəl gözəl, əvvəl gözəl.
Aşiq odur yana, yana,
Bülbül tək boyana qana,
Eşq əvvəldən düşdü cana,
Əvvəl gözəl, əvvəl gözəl.
Eşqinlə bağladım dastan,
Eşq qurtarar səni yasdan,
Əl üzmə vəfalı dostdan,
Əvvəl gözəl, əvvəl gözəl.
31 Yanvar 2013
Şərhlər
Hər hansısa bir şərh yazılmayıb.