Səhiyyə Nazirliyinə yeni səlahiyyətlər verilir

Səhiyyə Nazirliyinə dərman vasitələri ilə davranışın tənzimlənməsi sahəsində yeni səlahiyyətlər verilir.

APA-nın məlumatına görə, bu, “Dərman vasitələri haqqında” qanuna təklif edilən dəyişiklikdə əksini tapıb.

Beləliklə, qanun layihəsi Milli Məclisdə qəbul edildikdən sonra Səhiyyə Nazirliyi xüsusi nəzarətdə olan dərman vasitələrinin siyahısını tərtib edəcək, dərman vasitələrinin təsnifatlaşdırılmasını və dərman vasitələrinin ekspertizasını həyata keçirəcək. Layihədə qeyd edilib ki, xüsusi nəzarətdə olan dərman vasitəsi təhlükəsizlik baxımından xüsusi nəzarət tələb edən dərman vasitəsidir. Dərman vasitələrinin təsnifatlaşdırılması dərman vasitələrinin mənşəyi, buraxılma qaydası, fiziki-kimyəvi, toksikoloji, farmokoloji, terapevtik və digər xüsusiyyətlərinə görə sistemləşdirilməsi və qruplaşdırılmasıdır. Dərman vasitələrinin ekspertizası isə dərman vasitələrinin keyfiyyəti, effektivliyi və təhlükəsizliyinin müəyyənləşdirilməsi məqsədi ilə fiziki-kimyəvi, bioloji, klinikaya qədər tədqiqatlar, klinik sınaqlar (klinik tədqiqatlar), bioekvivalentliyin müəyyən edilməsi, eləcə də dərman vasitələrinin qeydiyyatı, farmakonəzarət sənədlərinin və standartlaşdırmaya dair normativ sənədlərin araşdırılması yolu ilə aparılan tədqiqat və sınaqlardır.

Digər dəyişiklik dərman vasitələrinin ölkədə tətbiqinin qadağan edilməsi ilə bağlıdır. Qüvvədə olan qanuna əsasən (4.3-cü maddə) dərman vasitələrinin istifadəsi təlimatlarında onların əlavə təsirləri və digər dərman vasitələri ilə qarşılıqlı əlaqəsi barədə istehsalçı tərəfindən bəyan edilməmiş məlumatlar müəyyən edildikdə, müvafiq icra hakimiyyəti orqanı – Səhiyyə Nazirliyi bu dərman vasitələrinin Azərbaycanda tətbiqini qadağan etmək hüququna malikdir. Təklif edilən dəyişikliyə əsasən dərman vasitələrinin istifadəsinə dair təlimatlarda istehsalçı tərəfindən bəyan edilməmiş məlumatlar, habelə dərman vasitələrinin keyfiyyəti, effektiv və təhlükəsiz olmadığına dair əsaslandırılmış faktlar müəyyən edildikdə Səhiyyə Nazirliyi bu dərman vasitələrinin dövlət qeydiyyatına alınmasını və dövlət qeydiyyatına alınmayan dərman vasitələrinin isə ölkədə tətbiqini qadağan etmək hüququna malik olacaq.

Qanun layihəsi parlamentdə qəbul edildikdən sonra dərman vasitələrinin dövlət qeydiyyatına dair yeni prosedur da müəyyənləşəcək. Qüvvədə olan qanuna əsasən dərman vasitələrinin Azərbaycana idxalına, satışına və istifadəsinə yalnız müvafiq icra hakimiyyəti orqanında – Səhiyyə Nazirliyində dövlət qeydiyyatına alındıqdan sonra yol verilir. Ancaq qanunda dərman vasitəsinin dövlət qeydiyyatından keçirilməsi üçün prosedur qayda əksini tapmayıb. Təklif edilən dəyişikliyə əsasən dövlət qeydiyyatı məqsədi ilə dərman vasitələrinin və həmin dərman vasitələrinin istehsalında istifadə edilən dərman maddəsinin (dərman substansiyasının) nümunələrini ölkə ərazisinə qanunvericilikdə müəyyən edilmiş miqdarda müvafiq icra hakimiyyəti orqanı, istehsal və ya topdansatış əczaçılıq fəaliyyəti ilə məşğul olan müəssisələr, xarici istehsalçının Azərbaycandakı yerli nümayəndəliyi və ya yerli nümayəndəliyi olmadığı halda xarici istehsalçının müvəkkil etdiyi şəxs idxal edə bilər.