Testdən keçib, müsahibədən keçə bilməyən həkim prezidentə müraciət etdi - "Məndən rüşvət istəyirlər..."

"“Nə olsun ki, imtahandan keçmisən, müsahibədən keçməyin qiymətini ki, bilirsən”, deyərək açıq-aşkar məndən rüşvət istədi"

Xaricdə təhsil alıb vətəninə dönən cərrah Ruslan Rəhimov Prezident İlham Əliyevə müraciət edib. Bu haqda APolitika.info-ya R.Rəhimov özü məlumat verib.

Ruslan Rəhimov ixtisasca həkim-cərrahdır. 1999-2005-ci illərdə Beynəlxalq Universitetin “müalicə işi” fakültəsini bitirərək Rusiya Federasiyası Həştərxan Dövlət Tibb Akademiyasında “Ümumi cərrahiyyə” üzrə “kliniki ordenatura” keçib. 2007-ci ildə isə həmin universiteti müvəffəqiyyətlə bitirib. Bir müddət Yəməndə həkim kimi çalışıb. Daha sonra Azərbaycana qayıdaraq öz vətənində xidmətini davam etdirmək istəyib. Lakin öz doğma vətənində Ruslan Rəhimova iş tapmaq problemə çevrilib. Səhiyyə Nazirliyindən gileylənən Ruslan Rəhimov deyir:

“2013-cü il 6 noyabr tarixində Səhiyyə Nazirliyində təşkil olunmuş sertifikasiya imtahanında iştirak etmişəm və 93 sualı cavablandırmışam. 3 saatdan sonra mənə dedilər ki, siz 53 balla kəsilmisiniz. Bu imtahandan narazı qaldığım üçün komissiya təşkil olundu və mən testə düşən sualların 30%-nin səhv olduğunu sübut etdim. Ona görə də, 6 sualı mənim xeyrimə hesab etsələr də 59 balla yenə kəsildim (Qeyd edim ki, lazım olan bal 60 bal idi). Bir bala görə yenə də imtahandan kəsildim. 2014-cü ilin fevral ayının 19-da yenidən test imtahanına girdim və 63 balla test imtahanının birinci mərhələsini keçdim. Lakin ikinci mərhələdə - müsahibədə komissiyanın sədri həkim Rauf Ağayev tərəfindən kəsildim. Səbəb kimi isə iş təcrübəmin olmadığını dedilər və məni yenə də kursa göndərdilər. Yeri gəlmişkən qeyd edim ki, hər dəfə kursa göndərilərkən borcla-xərclə də olsa Səhiyyə Nazirliyinə dövlət rüsumunu ödəmişəm. 2014-cü ildə mən yenə də müsahibəyə gəldim. Lakin bu dəfə Rauf Ağayev yox, özünü “Eksperimental” xəstəxananın cərrahı kimi təqdim edən həkim Kosayev (adını unutmuşam) mənlə sorğu-sual etdi. Mən suallara cavab versəm də, o mənə qulaq asmayıb və imtahanın nəticələrinə məhəl vermədən məni müsahibədən kəsdi. “Nə olsun ki, imtahandan keçmisən, müsahibədən keçməyin qiymətini ki, bilirsən”, deyərək açıq-aşkar məndən rüşvət istədi. Bu çox acınacaqlı bir durumdur. Test imtahanını keçsəm də, müsahibəni rüşvətsiz keçə bilməyəcəyimi gördüm. O üzdən cənab Prezident İlham Əliyevdən xahiş edirəm ki, mənə kömək etsin. Mən sadəcə bilik və təcrübəmi öz vətənimə sərf etmək istəyirəm. Mən övladımı normal həyat şəraitində böyüktmək istəyirəm. Heç bir yerdən gəlirim yoxdur. Bir tikə çörək üçün sürünməkdən usanmışam”.

Qeyd edək ki, Ruslan Rəhimov 5 dil bilir və hərbi xidmətdən də keçib.

Səhiyyə Nazirliyinin mövqeyini dinləməyə hazırıq.

Ülkər Musazadə 

635x100

Şərhlər

Hər hansısa bir şərh yazılmayıb.

Son yazılar