Seyidağa Mövsümlü dəfn olunub
Azərbaycan Ordusunun ilk hərbi operatoru Seyidağa Mövsümlü dəfn olunub.
Qarabağ qazisi, jurnalist Rey Kərimoğlunun APA-ya verdiyi məlumata görə, S. Mövsümlü Buzovna qəbiristanlığında torpağa tapşırılıb.
Mərhum teleoperatorun dəfn mərasimində Müdafiə Nazirliyinin nümayəndələri, kütləvi informasiya vasitələrinin əməkdaşları, müharibə veteranları və ailə üzvləri iştirak ediblər.
Qeyd edək ki, S. Mövsümlü gecə saatlarında uzun sürən xəstəlikdən sonra 64 yaşında dünyasını dəyişib.
S. Mövsümlü 1954-cü ildə Ucar rayonunda anadan olub. Azərbaycan Dövlət Teleradio Komitəsində teleoperator assistenti vəzifəsində əmək fəaliyyətinə başlayıb. Bu sahədə təhsil almaq üçün 1980-ci ildə Ümumittifaq Teleradio İnstitutuna göndərilib. Moskvada təhsilini uğurla başa vurub Bakıya qayıdıb. Azərbaycan Dövlət Teleradio Komitəsində teleoperator kimi fəaliyyətini davam etdirib.
S. Mövsümlü Xocalı soyqırımını, bütövlükdə Qarabağ müharibəsini lentə alan ilk operatorlarımızdandır. Dövlət televiziyasında çalışan vaxtlarında Azərbaycan Müdafiə Nazirliyinin yaratdığı ilk batalyonun - Şıxov batalyonunun ilk könüllülərindən olub. Bu batalyonda erməni işğalçılarına qarşı aparılan əməliyyatlarda qəhrəmancasına döyüşüb. İki dəfə yaralanıb.
Şərhlər
Seyidağa orduya gələnədək 20 Yanvar qətliamını,deportasiya olunan soydaşlarımızın yaşadıqları ağrıları lentə köçürmüşdü.Onun ömür yolunu daradıqca həyatını təmənnasız olaraq xalqına həsr edən qəhrəman Vətən oğlunu görürük.Çəkdiyi kadrlardan yaş damır, dərdlərimizlə baş-başa qalırıq. O, başdan-ayağa vətənpərvərlik mücəssəməsi idi.Yaralandıqdan sonra hərbiçilərimizin döyüş yolunu lentlərin yaddaşına toplayır,efirə vermək üçün hazırladığı informasiyalarla ön və arxa cəbhə arasında əlaqə qururdu..