Minsk qrupunun neçə üzvü var?
Dağlıq Qarabağ münaqişəsinin dinc həlli ilə məşğul olan ATƏT-in Minsk qrupunun tərkibi müxtəlif mənbələrdə fərqli göstərilir. “Media forum” saytı məsələyə aydınlıq gətirmək üçün ən mötəbər mənbəyə müraciət edib.
Sayt bildirir ki, ATƏT-in yenilənmiş rəsmi internet səhifəsində Minsk qrupuna dair ayrıca bölmə (www.osce.org/mg) yer alır. Həmin bölmədə Minsk qrupunun 11 üzvünün olduğu göstərilir. Üzvlər belə sıralanır: Rusiya, Fransa, ABŞ (hər üçü həmsədr), Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.
Minsk qrupunun tarixi 1992-ci il martın 24-də ATƏM Xarici İşlər Nazirləri Şurasının Helsinkidə keçirilən görüşündən başlayır. Həmin görüşdə Dağlıq Qarabağda vəziyyət müzakirə olunub, Nazirlər Şurası Minskdə Dağlıq Qarabağa dair sülh konfransının çağırılması haqqında qərar qəbul edib. 1992-ci il mayın 1-də konfransın reallaşması üçün Minsk qrupu yaradılıb, konfransa hazırlıq məqsədilə italyan Mario Rafaelliyə mandat verilib. O, 1994-cü ilə qədər Minsk qrupunun sədri funksiyasını icra edib.
1994-cü il dekabrın 5-6-da Budapeşt sammiti həmsədrlik institutu yaradıb. Həmin vaxt Minsk qrupunda həmsədrlik Rusiya ilə İsveçə tapşırılıb, sonradan İsveçi Finlandiya əvəzləyib. 1996-cı il dekabrın 30-da Finlandiya nümayəndəsinin əvəzinə Fransa təmsilçisi həmsədr təyin olunub. 1997-ci il fevralın 14-də Minsk qrupuna daha bir həmsədr ölkə qoşulub: ABŞ.
Şərhlər
Hər hansısa bir şərh yazılmayıb.