Gürcüstanda keçiriləcək prezident seçkisinin tarixi açıqlanıb

Gürcüstanda növbəti prezident seçkisi cari il oktyabrın 28-də keçiriləcək.

“Report” TASS-a istinadən xəbər verir ki, bu barədə Gürcüstanın İctimai Televiziyası məlumat yayıb.

Bildirilib ki, Gürcüstan prezidenti və hökumət administrasiyaları seçkinin oktyabrın 28-də keçirilməsi barədə razılığa gəliblər.

Gürcüstan Konstitusiyasına əsasən, növbəti prezident seçkisinin keçirilməsinə 60 gün qalmış baş nazir bu siyasi kampaniyanın tarixini açıqlamalıdır. Bu dəfə Gürcüstan prezidenti ümumxalq səsverməsi yolu ilə 6 il müddətinə seçiləcək.

Gürcüstanda bir nəfər iki dəfədən artıq prezident postunu tuta bilməz. 2010-cu ilin oktyabrında qəbul edilən konstitusiyaya əsasən, prezidentin səlahiyyətləri parlament və baş nazirin xeyirinə azaldılıb. Gürcüstan parlament idarəetmə üsuluna keçib.