ERMƏNİSTAN PARLAMENTİ AZƏRBAYCANA MÜHARİBƏ ELAN ETDİ - XİN-dən cavab

Dərc olunub: 13/09/2018 - 14:54

xin-bina“Ermənistanın Azərbaycana qarşı başladığı müharibə 27 ildən artıq davam edir. Ermənistanda keçirilən “Şant-2018” hərbi komanda-qərargah təlimləri çərçivəsində Ermənistan parlamentinin Azərbaycana qarşı müharibə elan etməsi ssenarisi mövcud faktın, yəni Ermənistanın işğalçı və təcavüzkar dövlət olmasının növbəti təsdiqi və etirafıdır”.

Bunu Azərbaycan Xarici İşlər Nazirliyinin Mətbuat xidmətinin rəhbəri Hikmət Hacıyev deyib.

O qeyd edib ki, bu, həmçinin, Ermənistanın yeni siyasi-hərbi rəhbərliyinin malik olduğu arxaik və feodal düşüncənin göstəricisidir: “Azərbaycan ATƏT-in Minsk Qrupunun həmsədrlərinin vasitəçiliyi ilə münaqişənin substantiv danışıqlar yolu ilə həlli istiqamətində konstruktiv addımlar atdığı və digər qonşu dövlətlərlə birlikdə regionun çiçəklənməsinə xidmət edən hərtərəfli regional əməkdaşlıq layihələrinin müəllifi qismində çıxış etdiyi halda, Ermənistanın yeni hakimiyyəti Sarqisyan rejiminin hərbi diktatura siyasətini davam etdirərək, regionu yeni hərbi avantüralarla və təhlükələrlə üzbəüz qoyur.

Beynəlxalq ictimaiyyət sivil dünya ilə Ermənistan arasında ciddi uçurumun olmasının şahidi olur. Ermənistana qarşı təsirli beynəlxalq siyasi-diplomatik təzyiqlərin göstərilməməsi Ermənistanın cəzasızlıq hissini daha da artırır.

Bir daha bəyan edirik ki, danışıqlar prosesinin pozulmasına, vəziyyətin gərginləşdirilməsinə və “müharibə oyunları” kimi hərbi avantüralara görə məsuliyyət tam şəkildə Ermənistan rəhbərliyinin üzərinə düşür”.

* * *

51c53258f11b16cd8e683f733c0b2b72Ermənistan parlamentinin sentyabrın 12-də keçirilən iclasında avantürist qərar çıxarılıb. Belə ki, işğalçı ölkənin Milli Məclisinin fövqəladə iclasında Azərbaycana rəsmən müharibə elan edilməsi haqda qərar qəbul olunub. Bununla bağlı Musavat.com erməni mediasına istinadən xəbər verir. Parlamentin mətbuat xidmətinin yaydığı məlumata görə, erməni parlamenti bu qərarı bir gün əvvəl Ermənistan ərazisində başlayan “Şant-2018” komanda-qərargah təlimləri çərçivəsində qəbul edib.

Qəbul edilmiş sənəddə deyilir ki, Ermənistan hökumətinin sentyabrın 12-də “Müharibə elan edilməsinin dəstəklənməsi barədə“ təklifini əsas tutaraq, Ermənistan Konstitusiyasının 118-ci maddəsini əsas götürərək, Ermənistan Milli Məclisinin Nizamnaməsinin 105-ci bəndinə əsaslanaraq parlament Azərbaycan Respublikasına müharibə elan etməyi qərara alır.

Qeyd edək ki, Ermənistanda 11 sentyabrdan etibarən “Şant-2018” komanda-qərargah təlimləri keçirilir. Təlimlər 14 sentybaradək davam edəcək. Bu müddətdə ölkə ərazisində hərbi vəziyyət elan edilib. Məlumatda deyilir ki, hərbi təlimlər planlı xarakter daşıyır və müdafiəyə hazırlıq məqsədi daşıyır.

Ancaq Ermənistan parlamentinin bu qərarı Paşinyan hökumətinin işğalı davam etdirməkdə qərarlı olduğunu və danışıqları pozmaq niyyətini nümayiş etdirir. Bu, həm də hakimiyyətin diqqəti daxildəki qarışıqlıqlardan yayındırmaq, xalqın diqqətini “xarici düşmənə” tönəltmək cəhdi də sayıla bilər.


loading...




Fikrinizi bildirin