ZİYA MƏMMƏDOV HƏBS OLUNMALIDIR, AMMA... - 700 milyonluq "səhv" və cəzasızlıq...

Son günlər kütləvi informasiya vasitələrində və sosial şəbəkələrdə Bakı-Quba-Rusiya yolunun dağılması ilə bağlı yeni müzakirələr başlayıb. Sadə vətəndaşlarla yanaşı ekspertlər və hətta deputatlar da bu müzakirələrdə fəal iştirak edirlər.

Əlbəttə, tikintisi 2009-cu ilin ortalarında tamamlanan və təxminən 700 milyon manata başa gələn yolun istismara verilməsindən 9 il sonra tamamilə sıradan çıxması (3 il keçməmiş dağılmağa başlamışdı -müəl.), üzərindən sükutla keçiləsi hadisə deyil. Bu, açıq-aşkar külli miqdarda dövlət vəsaitinin mənimsənilməsindən və ya səmərəsiz xərclənməsindən xəbər verir.

Yəni, yolun qısa müddətdə tam dağılması tikinti zamanı korrupsiyanın - total mənimsəmənin baş verdiyinə dair ciddi şübhələr yaradır. Buna görə araşdırma aparılmalı, məsuliyyətə cəlb edilənlər olmalıdır. Ancaq hələlik hüquq-mühafizə orqanları susqunluq nümayiş etdirdiyindən, günahkarlar ancaq mətbuatda və sosial şəbəkələrdə ittiham olunur.

Media orqanları, eləcə də məsələyə münasibət bildirən ekspertlər, deputatlar isə 700 milyonluq yolun dağılmasına görə məsuliyyəti birmənalı şəkildə o dövrdə nəqliyyat naziri işləyən Ziya Məmmədovun üzərinə qoyur, onu ittiham edirlər. Bu da təsadüfi deyil.

Əvvəla, bu yolun tikintisi üçün vəsait məhz Nəqliyyat Nazirliyinə ayrılıb. Tikintini həyata keçirən "Azəryolservis" ASC isə Nəqliyyat Nazirliyinin tabeliyində idi. Belə ki, 2005-cı ildən tikintisinə başlanan Bakı-Quba-Rusiya avtomobil yoluna 2005-2010-cu illərdə dövlət büdcəsinin investisiya xərclərindən 641 milyon 820 min manat pul ayrılıb. Beynəlxalq maliyyə təşkilatlarından alınan kreditlərlə birlikdə layihə 700 milyon manata başa gəlib. Yəni, pulun necə xərclənməsinə nəzarət Ziya Məmmədov tərəfindən həyata keçirilib.

İkincisi, yol 2009-cu ildə istifadəyə verilən zaman Ziya Məmmədov Bakı-Quba-Rusiya yolunun istismar müddətinin 30 il olduğunu vurğulamışdı. Amma cəmi 3 il sonra – 2012-ci ildə yol sıradan çıxmağa başladı, 9 il sonra isə tam dağıldı. Ona görə də, ictimaiyyət haqlı olaraq bu yolun belə tez dağılmasına görə Ziya Məmmədovun cavab verməli oduğunu düşünür. İnsanlar Məmmədovun bəzi suallara cavab verməsini istəyir: Niyə 30 il istifadə olunacağını dediyiniz yol 3 ilə dağıldı? O vədi verəndə yolun davamlılığını yoxlamışdınızmı? 700 milyonun neçə faizi "yeyilib" ki yol belə tez dağıldı və sairə.

Ancaq bu suallara cavab verməli olan yalnız Ziya Məmmədov deyil. Hətta dərindən araşdırılsa, bəlkə də bu “bahalı yolun” belə tez dağılmasına görə Ziya Məmmədov faktiki məsuliyyət daşıyanlar arasında heç də ön sıralarda olmayacaq. 

Əlbəttə, bununla Ziya Məmmədovun günahsız olduğunu iddia etmək fikrindən uzağıq. Ziya Məmmədovun “ŞİŞİRTMƏ” sahəsindəki “istedadından” hələ uzun illər danışılacaq.  Hörmətli Ziya müəllim 5 manatlıq layihəni 500 manata rəsmiləşdirməkdə, hətta sonradan bunu «özünəməxsus» şəkildə «əsaslandırmaqda» heç bir problem görməyən nadir nüsxələrdəndir.

Sabiq nazirin təkcə əvvəllər də mövcud olmuş Bakı-Aeroport yolunun yenidən tikintisi zamanı hər kilometrə görə 34 milyon dollar “xərcləməsi” (bəlkə də silməsi yazmalıydıq-müəl.) və bu fantastik qiyməti ərazinin relyefi, işçi qüvvəsinin dəyəri ilə “əsaslandırması” (sanki Himalay dağlarından isveçrəlilərə yol çəkdirib) dediyimizə əyani sübutdir.

Ancaq Bakı-Quba-Rusiya avtomobil yolunun tikintisi ilə bağlı məsuliyyəti yalnız Ziya Məmmədovun üzərinə qoymaq ədalətli deyil. Məsələ ondadır ki, həmin dövrdə tikintiyə birbaşa nəzarəti, adı son illərdə müəmmalı şəkildə bir neçə dəfə dəyişdirilən, hazırki Azərbaycan Avtomobil Yolları Dövlət Agentliyinın sələfi olan “Azəryolservis" ASC həyata keçirirdi. 2003-cü ildən 2015-ci ilə qədər isə həmin quruma hazırda "Azərbaycan Dəmir Yolları" QSC-nin sədri işləyən, milət vəkili Cavid Qurbanov rəhbərlik edib.

Bakı-Quba-Rusiya avtomobil yolunun tikintisi də məhz Cavid Qurbanovun “Azəryolservis" ASC-yə rəhbərlik etdiyi dövrdə, birbaşa onun nəzarəti altında həyata keçirilib. Yəni, 700 milyonluq yolun qısa müddətdən sonra dağılmasına görə hörmətli Cavid Qurbanovun heç də Ziya Məmmədovdan az məsuliyyət daşımadığını söyləmək olar. Bunu Cavid Qurbanovun özü də dolayısıyla etiraf edib.

O, 2015-ci ildə jurnalistlərə açıqlamasında Bakı-Quba-Rusiya avtomobil yolunun tikintisi zamanı "səhvə yol verdiklərini" bildirib. Sitat: “Bakı-Quba yolunun çəkilməsində bizim səhvlərimiz olub. Bunu boynumuza almalıyıq. Birincisi, texnikaya düzgün əməl olunmayıb. İkincisi, ağır tonnajlı maşınların yükgötürmə qabiliyyəti normalarına riayət edilməyib. Bunları etiraf edirik”.

Başqa bir müsahibəsində isə, Cavid Qurbanov 30 il istismar müddəti qoyulan Bakı-Quba-Rusiya avtomobil yolunun qısa müddətdən sonra dağılmasını təcrübəsizliklə bağlayıb: “Hər yerdə keyfiyyətdə müəyyən nöqsanlar ola bilər. Bakı-Quba yolu birinci dəfə idi tikilirdi. Ona görə də, təcrübəmiz yox idi… Səhvlər tikinti zamanı görülən işlərlə bağlıdır. Bu ehtiyatsızlıq, vaxt gözlənilməməsi ilə bağlıdır. Bu da təcrübəsizlikdən irəli gələn bir şeydir”.

Göründüyü kimi, Cavid Qurbanov dolayısıyla da olsa Bakı-Quba-Rusiya avtomobil yolunun dağılmasına görə rəhbərlik etdiyi qurumun məsuliyyət daşıdığını etiraf edib. Düzdür, yolun belə tez dağılmasında eyni zamanda yük daşıyan maşınların normadan artıq yüklənməsinin də payı olduğunu bildirib: “Heç kəsi başa salmaq olmur ki, maşınlara bu qədər yük vurmayın... Dünyada, o cümlədən, Azərbaycan yollarında avtomobillərin maksimum yükgötürmə qabiliyyəti 12 ton nəzərdə tutulub. Amma bizdə reallıqda maşınlar 30 tondan çox yük aparırlar. Hər gün Azərbaycanda minlərlə "Shagman" normadan iki dəfə artıq yük daşıyır. Onları başa salmaq olmur ki, bu yol sənin yolundur, onu özün qorumalısan".

Ancaq, əvvəla, bir kilometri 8-9 milyon dollara qədər şişirdilmiş smeta ilə yolu çəkəndə düşünmək lazım idi ki, buradan təkcə nəqliyyat boslarına məxsus avtomobillər yox, həm də yük avtomobilləri keçəcək. Ölkədə tikinti sektoru dinamik inkişaf edirsə, onda yüklərin daşınması təbiidir.

İkincisi, yük maşınının tutumu nə qədərdirsə, o qədər də yük götürür. “Azəryolservis”in borcu idi ki, yolun tikintisində bunu nəzərə alsın.

Elə ekspert Elməddin Muradlı da yük maşınlarının yolu dağıtmasının bəhanə olduğunu açıqlayıb: “Yol çəkilişindən sonra müvafiq qurumlara dəfələrlə sorğular verib Bakı-Quba-Rusiya yolunun neçə tonluq yük maşınlarının hərəkətinə hesablanmasını açıqlamalarını xahiş etmişəm. Açıqlamayıblar, gizli saxlayıblar. Ümumi cavablar verib, yaxalarını kənara çəkiblər. Halbuki, bu məlumat açıq olmalıdır. Bu gün dünyada yol çəkilişi praktikası var. Məsələn, yol çəkilərkən nəzərə alınır ki, gələcəkdə 5 qat artıq yükə dözümlü olsun... Yəni yolu 5 dəfə artıq yükə dözümlü tikməlidirlər. Daha bizdəki kimi 3-5 il sonra dağılacaq qədər zəif tikilməməli idi... Digər tərəfdən, Bakı-Quba-Rusiya yolu ağır tonnajlı maşınlara görə dağılıbsa, bəs Bakı Dairəvi Yolunun Hövsan istiqamətində çəkilmiş beton yol niyə dağılır? Həmin yoldan ki, ağır tonnajlı maşınlar keçmir... Çünki yol çəkilişi məsuliyyətsizlik və nəzarətsizlik şəraitində aparılıb. Büdcədən yol çəkilişi üçün ayrılan pulların heç 30 faizi təyinatı üzrə xərclənməyib".

Göründüyü kimi, ekspert yolu Cavid Qurbanovun iddia etdiyi kimi ağır tonnajlı maşınların deyil, korrupsiyanın dağıtdığı qənaətindədir. Bu korrupsiyada kimin nə qədər payı olduğunu isə hüquq-mühafizə orqanları ortaya çıxarmalıdır...

Yəni, dünyanın ən bahalı yollarından biri hesab edilən Bakı-Quba-Rusiya yolunun normal istismar müddəti heç 5 il belə çəkmədi. Ancaq qəribə də olsa, Azərbaycan dövlətinə 700 milyona başa gələn bu yolun dağılmasına görə heç kim məsuliyyətə cəlb olunmayıb. Ziya Məmmədov işdən çıxıb biznesi ilə məşğuldur, Cavid Qurbanov isə “səhv etmişik” deyib məsələni qapadıb.

Nə gözəl məmləkətdir, deyilmi?

Murad Məmmədov

AzPolitika.info

635x100

Şərhlər

antiAbu 2018-09-18 20:07:46

2. "Asfalt yeyintisi"nin araşdırılması mürəkkəb iş deyil. Bunun üçün şurflar açılmalı, nümunələr götürülməli, bu nümunələrin tərkib və sıxlıqları müəyyənləşdirilməli, asfaltaltı təbəqələrin sıxlıqlarının və tərkiblərin smeta ilə tutuşdurulması işləri görülməlidir. Bu işlərin görülməsinə start verilməyəcək. Heç verilə də bilməz! Bu üç asfalt yeyənlərin çəkdikləri yolların,,,

antiAbu 2018-09-18 20:07:46

1. "Asfalt yeyintisi"nin əsasını Hacıbala Abutalıbov qoyub. "Asfalt yeyintisi"nə görə, Hacıbala Abutalıbov, Cavid Qurbanov və Ziya Məmmədov həbs olunmalı idilər. Amma onlar həbs olunmayacaqlar! Çünki ,,,,,Hacıbalaya yeni vəzifə verildi. Cavidə dəyib - dolaşan olmadı. Bu asfaltlar keyfiyyətsizdirlər. Yağış suları bu asfaltları yuyub aparır. Sanki çəkilən asfalt deyil, şəkər tozudur. Tutulmuş smetalardakı qiymətlər həddindən artıq şişirdilib.

Mowuya 2018-09-18 20:07:46

Sag ol wair,daha senin werhlerini oxuyacam.

xanlar yavlaxlı 2018-09-18 20:07:46

Ziya müəllim gözəl elimizin ağsaqqalı, mehriban, qayğıkeş bir insandır. Ondan muqayət olmaq lazımdır. Onu əsəbləşdirib narahat edə biləcək heç nə yazmayın. Qoy onun ruhu həmişə şad olsun.

Moshu 2018-09-18 20:07:46

Ay sadəlöhv insanlar. "Bəxt üzüyü"ndə Söylü deyir ki, bizim kənddə ildə bir dəfə doğmayan arvadın kişisinə pis baxırlar. Bizim Azərbaycanda isə "Şöhrət" ordeni, "Tərəqqi" medalı almaq üçün dövlət əmlakını mənimsəməyən, Məharət Mustafayev kimi bir torpaq sahəsini dəfələrlə bir neçə nəfərə satmayan, icra başçısının dağarcığı olan, məsuliyyətdən kənar qalan adamlara pis baxırlar. Məzəniz olsun.

Əsəd 2018-09-18 20:07:46

Bu qədər cinayət olub cəza olmayan yer ancaq bizim ölkədə ola bilər. Karl Marks vaxtiykən demişdir : Xalqın əxlaqı və mənaviyyatı iki halda pozulur. Birinci Cinayət olub cəza olmayanda, ikincisi cəza olub cinayət olmayanda.

Sedaqet 2018-09-18 20:07:46

Ziya memmefov oz halinda oz ev eshiyinde balalari xoshbext ozu saglam size ne dushub eee iller sonra muzakire edirdiz?

EJDER 2018-09-18 20:07:46

ESAS INKIWAFDU . ZAMAN HER WEYI GOSTERECEK ISE EN DUZGUN FIKIRDI.BELE INKIWAFIDA YOLLARIN AQIBETI GOZLEYIR.YALAN PALANLAR MEMLEKETI

mühəndis 2018-09-18 20:07:46

Yazı çap edəndə gərək mövzu üzrə məlumatlı olasan.Yol layihəsi icra olunmaq üçün Qurbanovun rəis olduğu Azəryolservisə verilib. Adı çəkilən "Şadman" yük avtomobilləri də həmin quruma mənsub olduğundan projesi əlində olan qurum bu abtomobilin yükünün çəkisini gözəl bilməli və əgər artıq yükləniblərsə elə bu "Azəryolservisin" günahıdlr.Bütün hallarda Ziya Məmmədovla bərabər ilk növbədə Azəryolservisin rəhbərliyi məsuliyyət daşıyır. Yol çəkilişinin 1 km.nin qiymətinə gəldikdə isə bu aeaşdırılma mövzusudur.

yusif-1313-ə 2018-09-18 20:07:46

O cənablar yediklərini tək ha yeməyiblər ki, onlar cəzalandırılsınlar!! Onları cəzalandırmaq üçün Qdlyan-İvanov cütlüyü lazımdır. Onların da ağzını Rəşidova tərəf çevirdilər.

yusif-1313 2018-09-18 20:07:46

Həyat göstərir ki korrupsiyaya batmiş yüksək vəzifəli şəxslər cəzalandirilmirlar.E.MAHMUDOV, Z.MƏMMƏDOV, Ə.ABBASOV VƏ SAİRƏLƏRİ

Yolçu 2018-09-18 20:07:46

Kim kimedir Bakıda, Zümzümedir Bakıda; veya: Bakının derdi var, Bakı xestedir...

ayzek 2018-09-18 20:07:46

C.QURBANOVDAN SORUŞMAQ LAZIMDIR Kİ TƏCRÜBƏN YOX İDİSƏ BU CÜR MƏSULİYYƏTLİ İŞƏ NİYƏ GİRİŞİRDİN? GEDİB KƏND YOLLARINI ÇƏKİB TƏCRÜBƏ YIĞARDIN.BAKI-RUSİYA YOLUNU İSƏ XARİCİ ŞİRKƏTLƏR ÇƏKƏRDİ-SİZDƏN DƏ UCUZ VƏ KEYFİYYƏTLİ!Z.MƏMMƏDOVDAN İSƏ OĞUZ-QƏBƏLƏ-BAKI SU XƏTTİNİN HESABINI SORUŞMAQ LAZIMDIR.ELƏ BİL Kİ SU BORULARI QIZILDAN İMİŞ...

Son yazılar