Dünyanın ən iri şirkətlərindən biri aktivlərini SOCAR-a satmaq niyyətindədi

Dünyanın ən iri dəniz limanı operatorlarından sayılan “APM Terminals” şirkəti Türkiyə bazarını tərk edir.Virtualaz.org Türkiyədə dərc edilən “Dünya” qəzetinə istinadən xəbər verir ki, 2012-ci ildə bu ölkədə işə başlamış şirkət “Petlim”lə bağlanmış müqaviləyə əsasən, türk şirkətini 28 il ərzində işlətməli idi.

Hollandiyanın “APM Terminals” şirkətinin qərarı ilə bağlı yazıda deyilir: “22 min nəfərə yaxın işçisi olan və dünyanın 50 ölkəsində işləyən “APM Terminals” mənzil-qərargahı Danimarkada yerləşən “AP Moller-Maersk Group”un bir hissəsidir”.

Mənbə əlavə edir ki, “APM Terminals” Türkiyədə sahib olduğu aktivləri “Petlim”in sahibi olan Azərbaycan Dövlət Neft Şirkətinə (SOCAR) satmaq niyyətindədir. Bu sövdələşmə baş tutarsa, “SOCAR Turkey Enerji” şirkəti “APM Terminalleri Liman İşletmeciliği”nin səhmlərinin 100 faizinə sahib olacaq.

Hollandiya şirkətinin işlətdiyi və İzmirdə yerləşən “Petlim” limanı 700 metr uzunluğundadır və Türkiyənin ən böyük 3-cü konteyner mərkəzidir.