Elçin Quliyevin hesabat müşavirəsi qalmaqal yaratdı - Müdafiə Nazirliyindən açıqlama
Müdafiə Nazirliyi Azərbaycan-Ermənistan dövlət sərhədinin Qazax və Ağstafa rayonları ərazisində düşmənlə təmas xəttinə Dövlət Sərhəd Xidmətinin bölmələrinin nəzarət etmələri məsələsinə aydınlıq gətirib.
Müdafiə Nazirliyindən "Report"a verilən məlumata görə, dövlət sərhədinin bu hissəsində, əməliyyat şəraiti baxımından nisbətən sabit və düşməndən 2000 metrədək uzaqlıqda yerləşən postlar Dövlət Sərhəd Xidmətinin bölmələrinə təhvil verilib.
"Eyni zamanda Müdafiə Nazirliyi bölmələrinin döyüş təcrübəsi nəzərə alınaraq, onlar hazırda Qazax və Ağstafa rayonlarının sərhəd xəttində ağır silah və döyüş texnikası ilə sərhədçilərə dəstək göstərir. Qeyd edək ki, sərhəd xəttinin qarşı tərəfində Ermənistan Daxili İşlər Nazirliyinin polis dəstələri növbə çəkir.
2016-cı ilin aprel döyüşlərində sərhədçilərin iştirakına gəlincə isə həmin dövrdə düşmənə qarşı aparılan əks-həmlə əməliyyatlarında Azərbaycan Ordusunun cəmi 18 faiz şəxsi heyəti iştirak edib və Dövlət Sərhəd Xidmətinin 6 nəfər hərbçisi arxa cəbhədə olmaq şərtilə texniki dəstək məqsədilə əməliyyata qatılıb. Bu barədə beynəlxalq qurumlara da məlumat verilib", - deyə məlumatda qeyd olunub.
Xatırladaq ki, dünən Dövlət Sərhəd Xidmətinin rəisi general-polkovnik Elçin Quliyev 2018-ci ildə xidməti-döyüş fəaliyyətinin yekunlarına həsr olunan hesabat müşavirəsində həmin ərazilərdə xidməti-döyüş fəaliyyətinin Dövlət Sərhəd Xidmətinin Sərhəd Qoşunları tərəfindən təşkil olunduğunu bildirmişdi.
Şərhlər
Dövlət Sərhəd Xidməti ölkənin ən intizamlı, peşəkar hərbi xidmət qurumudur. Elçin Quliyev isə dövlətə, onun başçısına sadiq şərəfli türk generalıdır,ona tapşırılan işin öhdəsindən layiqincə gəlir. Tanrı yurdu qorusun! İgid əsgər, möhkəm dayan!