Avropa Parlamentində Azərbaycandakı seçki müzakirə olunub- "Saxtalaşdırılıb..."

Parlamentin üzvləri seçkiyə müsbət rəy vermiş həmkarlarını tənqid atəşinə tutdu

Avropa Parlamentinin xarici məsələlər üzrə komitəsi Azərbaycanda keçirilmiş prezident seçkisi, eləcə də Avropa Parlamentinin seçkini müşahidə missiyasının bu seçkiyə dair qərarını müzakirə edib.

“Azadlıq” radiosunun məlumatına görə, Yaşıllar Avropa Azad Alyans qrupu missiyanın rəsmi hesabatını kəskin tənqid edib.

Yaşılların xarici məsələlər üzrə sözçüsü Ulrike Lunacek bildirib ki, Avropa Parlamentinin Azərbaycandakı seçki ilə bağlı hesabatı saxtadır və ATƏT-in Demokratik Təsisatlar və Insan haqları Bürosunun, eləcə də xeyli yerli müşahidəçilərin dediklərinə kəskin şəkildə ziddir: “Avropa Parlamentinin hesabatında boğucu mühit, insan haqlarının pozulması, siyasi müxalifətin təqib olunması və əsas demokratik prinsiplərinin məhdudlaşdırılması məsələləri əks olunmayıb.

Yaşıllar Avropa Azad Alyans qrupu Avropa Parlamenti nümayəndə heyətinin bu bəyanatını dəstəkləmir və ATƏT-in Demokratik Təsisatlar və Insan Haqları Bürosununÿseçkiləri müşahidə eləmiş missiyasının rəhbəri Tana de Zulieta ilə görüş istəyir".

Qeyd edək ki, qrupun xarici əlaqələr üzrə sözçüsü Verner Şults da eyni mövqedən çıxış edib. O bildirib ki, Avropa Parlamentinin Azərbaycanda seçkini müşahidə etmiş missiyasının bu ölkədəki real vəziyyəti inkar edərək, seçkiyə müsbət qiymət verməsi Avropa Parlamentinə etimadı sarsıdıb: “Avropa Parlamentinin bir neçə üzvü qurumun insan hüquqları, demokratiya və qanunun aliliyi uğrunda mübarizədə qazandığı nüfuzu ciddi şəkildə təhlükə altında qoyub. Avropa Parlamentinin nümayəndələri ATƏT-in Demokratik Təsisatlar və Insan Hüquqları Bürosunun missiyası və yerli müşahidəçilərlə fəaliyyət göstərməli, onlarla eyni mövqedən çıxış etməlidir. Əks halda, bu, vergi ödəyicilərinin pullarının boşuna xərcləndiyi anlamına gələcək”.