“Deputat işimə müdaxilə edir” - İcra başçısı

Sabunçu Rayon İcra Hakimiyyətinin başçısı Adil Vəliyev rayondan seçilən deputat, Qafqaz Müsəlmanları İdarəsinin sədri Şeyxülislam Hacı Allahşükür Paşazadənin qudası Hacı Qalib Salahzadə ilə aralarında yaranan qarşıdurma ilə bağlı mətbuatda gedən məlumatlara cavab verib.

İcra başçısı A.Vəliyev Publika.az-a açıqlamasında deyib ki, aramızda heç bir problem yoxdur:

“Hər şey qaydasında və normadır. Mən burada ancaq cənab Prezidentin siyasətini həyata keçirirəm, rayonun abadlıq və quruculuğu işi ilə məşğulam. Rayonda müvafiq kadrları özüm təyin edirəm. Heç kəsin fikri mənə təsir göstərə bilməz”.

İcra başçısı A.Vəliyev “Deputat Qalib Salahzadə sizin işlərinizə hər hansı müdaxilə edibmi?” sualına da belə cavab verib:

“Bəli, elə hallar olub. O istəyirdi ki, orada ancaq bilgəhli olsun. Mən isə dedim ki, fərqi yoxdur, Azərbaycanın cəbhə bölgəsindən olan və ölkəmizin siyasətini yaxından dəstəkləyən istənilən şəxs hər hansı bir yerdə idarəçilikdə çalışmağa layiqdir. Ona görə də indiki adam burada işləyə bilər. Burada başqa hər hansı söhbət də ola bilməz”.

Xatırladaq ki, Sabunçu Rayon İcra Hakimiyyətinin başçısı Adil Vəliyevlə bu rayondan seçilən deputat, Qafqaz Müsəlmanları İdarəsinin sədri Şeyxülislam Hacı Allahşükür Paşazadənin kürəkəni Hacı Qalib Salahzadə arasında qarşıdurma yaranması ilə bağlı teleqraf.com saytında məlumat yayılmışdı.