Azərbaycanda iflas haqqında iş üzrə məhkəmə baxışı qaydası müəyyənləşib

Azərbaycanda iflas haqqında iş üzrə məhkəmə baxışı qaydası bəlli olub.

ONA-nın məlumatına görə, bu, bu gün Milli Məclisin plenar iclasında müzakirəyə çıxarılan “Müflisləşmə və iflas haqqında” qanuna təklif edilən yeni 10-1-ci (İflas haqqında iş üzrə məhkəmə baxışı) maddədə əksini tapıb.

Yeni maddəyə əsasən, iflas haqqında iş üzrə ərizəyə məhkəmə daxil olduğu gündən 1 (bir) ay müddətində baxır və həmin işin həllinə dair müvafiq qərar çıxarır. Çıxarılan qərardan şikayət verildiyi halda, həmin şikayətə sonrakı instansiya məhkəmələrində ərizənin daxil olduğu gündən 1 (bir) ay müddətində baxılır və həmin işin həllinə dair müvafiq qərar çıxarılır.

İşdə iştirak edən şəxslər məhkəmə iclası barədə həmin iclasa ən azı 5 (beş) iş günü qalmış xəbərdar edilməlidir. Ərizə eyni zamanda məhkəmə baxışının tarixinə 5 (beş) iş günü qalanadək həmin məhkəmə baxışı haqqında müvafiq icra hakimiyyəti orqanının rəsmi internet səhifəsində və rəsmi dövri mətbu nəşrdə dərc edilməlidir.

Layihə səsverməyə çıxarılaraq qəbul edilib.