TÜRK LİSEYLƏRİ İLƏ BAĞLI SENSASİYALI QƏRAR - "Zərifə Əliyeva liseyləri" oldular?

Azərbaycanda bir müddət əvvəl fəaliyyətini dayandırmış türk liseyləri kimi tanınan və “Çağ Öyrətim İşlətmələri”nə daxil olan məktəblərin fəaliyyəti bərpa olunub.

Bu barədə Oxu.Az-a məlumat verən valideynlər bildiriblər ki, dünən axşam keçmiş Dədə Qorqud Özəl Türk liseyində Təhsil Nazirliyinin nümayəndələrinin iştirakı ilə iclas keçirilib.

Bildirilib ki, keçmiş türk liseylərinin fəaliyyəti bərpa olunacaq və bundan sonra bu məktəblər Zərifə Əliyeva adına liseylər kimi fəaliyyət göstərəcəklər.

“Çağ Öyrətim İşlətmələri”nə daxil olan keçmiş Azərbaycan Beynəlxalq Təhsil Mərkəzinin müdir müavini Məhəmməd Hüseynov açıqlamasında yayılan məlumatları təsdiqləyib.

“Bundan sonra tədris müəssisələri Zərifə Əliyeva adına liseylər kimi fəaliyyətini davam etdirəcək. Tədris sistemi Azərbaycan Respublikası Təhsil Nazirliyinin əsasnamələri əsasında həyata keçiriləcək. Məktəbdə çalışan müəllimlərin ştatında isə heç bir dəyişiklik yoxdur”.

Qeyd edək ki, valideynlərin bildirdiyinə görə, nazirlik nümayəndələri sentyabrın 12-də onların bir daha iclasa dəvət olunacaqlarını bildiriblər.

Xatırlatmaq yerinə düşər ki, hələ bir müddət əvvəl AzPolitika.info məlumat vermişdi ki, Azərbaycandakı "Gülənçi" şəbəkə bütün gücünü səfərbər edib ki, Azərbaycandakı təhsil sistemləri tam dağılmasın və ən pis halda başqa ad altında fəaliyyətini davam etdirsin. Bu məqsədə çatmaq üçün şəbəkə hakimiyyət daxilindəki aşkar və gizli dayaqlarının imkanlarından maksimum istifadə etməyə çalışırdı.

Belə görünür ki, "Gülənçi" şəbəkə məqsədinə nail olub - başqa ad altında olsa da, sistemi xilas edə bilmələri onların uğurudur.

***

SOCAR-dan “Çağ Öyrətim İşlətmələri”nə daxil olan məktəblərin açılması ilə bağlı yayılan xəbərə reaksiya gəlib. 

“Qafqazinfo”ya açıqlamasında ARDNŞ Mətbuat Xidmətinin rəhbəri Nizaməddin Quliyev bildirib ki, “Azərbaycan Beynəlxalq Təhsil Mərkəzi” bağlanan məktəblər haqqında qərarını bir müddət əvvəl verib: “Həmin qərar yenə də qüvvədədir. Yayılan məlumatlar həqiqəti əks etdirmir”.

Qeyd edək ki, “Azərbaycan Beynəlxalq Təhsil Mərkəzi” SOCAR-ın nəzdində fəaliyyət göstərir.

* * *

""Çağ Öyrətim İşlətmələri”nə daxil olan liseylər Zərifə Əliyeva adına liseyin Eksperimental pilot sinifləri kimi fəaliyyətlərini davam etdirəcəklər"

Azərbaycan Beynəlxalq Təhsil Kompleksinin (“Çağ Öyrətim İşlətmələri”) bir müddət əvvəl fəaliyyəti dayandırılan liseyləri akademik Zərifə Əliyeva adına liseyin tabeçiliyinə verilib.

Zərifə Əliyeva adına liseyin direktoru Məhəbbət Vəliyeva APA-ya açıqlamasında məlumatı təsdiqləyərək bildirib ki, bununla bağlı təhsil nazirinin əmri var. Onun sözlərinə görə, bu liseylər akademik Zərifə Əliyeva adına liseyin “Eksperimental pilot sinifləri” adlanacaq və belə formada fəaliyyət göstərəcək: “Bizim lisey dövlət liseyidir və Təhsil Nazirliyinin birbaşa tabeliyindədir. Liseydə Azərbaycan və rus dillərində təhsil verilir. Amma hazırda fəaliyyət göstərəcək eksperimental pilot siniflərdə təhsil ingilis dilində və ödənişli olacaq. Bu vaxta kimi fəaliyyət göstərən türk liseylərində də şagirdlər məhz ingilis dilində və ödənişli təhsil alırdılar”.

M.Vəliyeva əlavə edib ki, liseylər əvvəlki binalarında fəaliyyətlərini davam etdirəcəklər. Onun sözlərinə görə, əvvəlki qaydalar saxlanılmaqla liseyin şagirdləri öz təhsillərini davam etdirəcəklər: “Yalnız bunların hamısı dövlətin nəzarətinə keçib və dövlət standartları orada da tətbiq olunacaq. Hər bir liseyin idarəçiliyi Zərifə Əliyeva adına lisey tərəfindən olacaq. Qəbul olunan şagirdlər və liseylər bizim liseyin tərkib hissəsidir. Buna görə də liseylərdə illik ödəniş, müəllim heyəti və hər şey saxlanılmaqla onlar Zərifə Əliyeva adına liseyin tabeçiliyində fəaliyyət göstərəcəklər”.

Təhsil Nazirliyindən APA-nın sorğusuna verilən cavabda isə bildirilib ki, nazirlik Azərbaycan Beynəlxalq Təhsil Kompleksinin ləğv olunmuş ümumtəhsil müəssisələrinin şagirdlərinin yerləşdirilməsi prosesini yekunlaşdırır. Son məlumata əsasən, burada təhsil almış şagirdlərin 42 faizi artıq digər dövlət və özəl məktəblərinə qəbul olunub. Digər təhsilalanların Azərbaycan Respublikasının Konstitusiyası ilə təsbit edilmiş təhsil hüquqlarını təmin etmək və təhsillərini yüksək səviyyədə davam etdirilməsinə imkan yaratmaq məqsədilə Təhsil Nazirliyi Bakı şəhərində Akademik Zərifə Əliyeva adına liseydə, regionlardan isə Gəncə, Şirvan, Quba, Lənkəran, Mingəçevir və Ağdaşda fəaliyyət göstərən və şagirdlərinin nailiyyətlərinə görə həmin bölgədə ilk pillələri tutan dövlət ümumtəhsil müəssisələrində eksperimental pilot siniflərin açılması barədə qərar qəbul edib.

Qəbul olunmuş qərara əsasən, eksperimental pilot siniflər həmin şəhərlərdə mövcud olan ABTK-nın bağlanmış lisey binalarında yerləşdiriləcək və seçimini etməmiş şagirdlərə könüllü əsaslarla bu məktəblərə keçmək təklif olunacaq. Eksperimental pilot siniflərdə tədrisin təşkili üçün özəl təhsil qurumlarının cəlb olunması nəzərdə tutulur. Burada tam orta təhsil proqramından əlavə, ayrı-ayrı fənlərin dərinləşdirilmiş, o cümlədən xarici dillərdə tədrisi proqramı tətbiq olunacaq.

Sentyabrın 15-də bütün ölkədəki kimi qeyd olunan siniflərdə də tədris prosesinə başlanacaq.

Azərbaycan Beynəlxalq Təhsil Mərkəzi İdarə Heyətindən (ABTM İH) isə APA-ya bildirilib ki, əvvəllər “Çag Öyrətim İşlətmələri” Şirkətinin məktəbləri kimi fəaliyyət göstərmiş, sonradan ABTM-nın tərkibində Azərbaycan Beynəlxalq Təhsil Kompleksinə daxil olmuş və artıq qapanmış məktəblərdəki yerli müəllimlərin və şagirdlərin yerləşdirilməsi ilə bağlı işlərlə Azərbaycan Təhsil Nazirliyi məşğuldur: "ABTM-də bağlanmış məktəblərin daşınmaz əmlakının Təhsil Nazirliyinə verilməsi ilə bağlı sənədləşmə işləri tamamlanmaq üzrədir".

Xatırladaq ki, oxu.az saytı liseylərin yenidən fəaliyyətə başlaması ilə bağlı məlumat yayıb. Məlumatda bildirilir ki, tədris müəssisələri Zərifə Əliyeva adına liseylər kimi fəaliyyətini davam etdirəcək. Tədris sistemi Azərbaycan Respublikası Təhsil Nazirliyinin əsasnamələri əsasında həyata keçiriləcək. Məktəbdə çalışan müəllimlərin ştatında isə heç bir dəyişiklik yoxdur.

Rasim Əliyev 

635x100

Şərhlər

Hər hansısa bir şərh yazılmayıb.

Son yazılar