Tramp Koreya yarımadasındadır - Kim Çen Inı ABŞ-a dəvət etdi

Bu gün Şimali Koreya lideri Kim Çen Inla görüşən ABŞ prezidenti Donald Tramp onu ABŞ-a dəvət edib.

***

Pxanmuncom danışıq məntəqəsində ABŞ və Şimali Koreya liderləri Donald Tramp və Kim Çen In arasında görüş başlayıb.

"Report" CNN-ə istinadən xəbər verir ki, iki ölkə lideri hərbsizləşdirilmiş zonada bir-biri ilə əl sıxıb.

Ardınca Tramp və Kim Çen In hərbsizləşdirilmiş zonanın Şimali Koreya tərəfinə keçiblər və Tramp KXDR sərhədini keçən ilk Amerika prezidenti olub.

O, bunu özü üçün şərəf adlandırıb. Daha sonra onlar danışıqlar aparmaq üçün birlikdə Cənubi Koreya tərəfə keçiblər.

Donald Tramp hərbsizləşdirilmiş zonaya səfərinin bir neçə ay əvvəlcədən planlaşdırıldığını deyib:

"Bu səfər bir neçə ay əvvəldən planlaşdırılıb. Biz G20 sammitini tərk etdik və mən sizin prezident və dostum Mun Çje İnə hərbsizləşdirimiş zonaya gedəcəyimə söz verdim".

Amerika prezidenti bildirib ki, o, iyunun 29-da KXDR liderinə zəng etmək və bir-birini salamlamaq istəyib-istəmədiyini soruşmaq qərarına gəlib.

"Odur ki, o, əvvəlcədən bu barədə məlumatlı olmayıb", — deyə Tramp bildirib.

***

ABŞ Prezidenti Donald Tramp Koreya yarımadasında hərbsizləşdirilmiş zonaya gedib.

ABŞ prezidenti bildirib ki, Şimali Koreya lideri Kim Çen Inla görüşün olacağına ümid edir.

"Report" "RİA Novosti"yə istinadən xəbər verir ki, bu barədə ABŞ telekanalları bildirib.

"Mən hərbsizləşdirilmiş zonaya gedirəm və anladığım qədər onlar görüşmək istəyirlər, mən isə salamlaşmaq istəyərdim. Bu çox qısa olacaq", - deyə Tramp Cənubi Koreyadan olan biznesmenlər qrupu qarşısındakı çıxışında deyib.

Daha əvvəl ABŞ prezidenti Kim Çen Ina qısa görüş təklif edib. Trampın rəsmi proqramı Ağ Ev rəhbərinin hərbsizləşdirilmiş zonada təxminən 15 dəqiqə olması nəzərdə tutulub.

"Biz danışaraq heç nə itirmirik", - Tramp əlavə edib.

Onun sözlərinə görə, görüş hələ qəti müəyyən edilməyib. "Baxaq, nə olacaq, hələ heç nə qəti deyil", - Tramp deyib.