Asəf Quliyev istefasının səbəbini açıqladı, amma heç nə demədi - AXCP rəsmisi şantaj olunub?

Azərbaycan Xalq Cəbhəsi Partiyasının (AXCP) sabiq sədr müavini, Milli Şuranın Mitinq Komitəsinin keçmiş sədri Asəf Quliyev təmsil olunduğu partiyadan və Milli Şuradan istefasının səbəblərini açıqlayıb.

A.Quliyev APA-ya açıqlamasında bildirib ki, son vaxtlar Milli Şurada baş verən proseslər qurumdan istefa verməsinə səbəb olub: “Mən sözsüz ki, heç kimin şəxsiyyətinə qarşı hər hansı fikir söyləyə bilmərəm. Hərənin öz şəxsiyyəti və fəaliyyəti var. Ancaq Mili Şura yarandığı gündən Mili Şuranın əleyhinə danışan, təbliğat aparan, Milli Şuranın yanlış olduğunu iddia edənlərin birdən-birə qurumda təmsil olunması, Cəmil Həsənlinin vəkili olması məni narahat edirdi. Ona görə də həmin adamlarla birlikdə olmamaq üçün Milli Şuradan istefa verdim”.

AXCP-dən də getməsinin səbəbinin eyni olduğunu vurğulayan A.Quliyev partiyaya qarşı hər hansı iddiası olmadığını vurğulayıb: “Mən həyatımın əsas hissəsini orda keçirmişəm. Ona görə də təşkilat mənim üçün əzizdir”.

AXCP-nin keçmiş funksioneri bundan sonrakı fəaliyyəti barədə də danışıb. O, yeni siyasi hərəkat formalaşdıracağını bildirib: “Sözsüz ki, bundan sonrakı fəaliyyətimi də uzun müddət xalq hərəkatında çiyin-çiyinə olduğum əqidədaşlarımla birlikdə davam etdirəcəyəm. Yeni bir hərəkat yaratmaq niyyətindəyik. Hərəkat tam fərqli bir formada olacaq. Azərbaycanda milli ideologiyanın təbliği, dövlətçilik, proseslərə münasibət hərəkatın ideologiyasını təşkil edəcək. Hələlik bununla bağlı müzakirələr gedir. Yəqin ki, dekabr ayında hərəkat tam formalaşacaq”.

Asəf Quliyevin 3 həftədir "açıqlayacam-açıqlayacam" deyə, anonsunu verdiyi bu açıqlaması, heç şübhəsiz ki, onun istefasının əsl səbəbi deyil. Bu açıqlamadansa Asəf bəy ümumiyyətlə sussa daha hörmətli olardı. Milli Şurada guya kimlərinsə təmsil olunmasına görə A.Quliyevin belə radikal qərar qəbul etdiyinə kimi inandırmaq olar?

A.Quliyevin istefasında hakimiyyətin rolunun olduğuna siyasi təcrübəsi olan adamlar şübhə etmirlər. Seçkiyə sayılı günlər qalmış belə zəif, az inandırıcı arqumentlə istefa verib, mübarizəyə zərbə vurmağın, diqqəti əsas məsələdən yayındırmağın daha ciddi səbəbləri olmalı idi.

Yeri gəlmişkən, AzPolitika.info-ya daxil olan məlumata görə, AXCP rəhbərləri öz aralarındakı söhbətlərdə A.Quliyevin istefasını onun şantaja məruz qalması ilə izah edirlər.

Lakin bu az inandırıcıdır. A.Quliyev şantaja məruz qalan adama bənzəmir. Onun yeni hərəkat yaratmağa hazırlaşması, bu günkü açıqlamasında "dövlətçilik" vurğusu, fikrimizcə müəyyən nəticələr çıxarmağa əsas yarada bilir.

V.Nəsibov

 

635x100

Şərhlər

Hər hansısa bir şərh yazılmayıb.

Son yazılar