“RUSİYA GÜZƏŞTƏ GEDƏN KİMİ...” – “Viza rejiminin ləğvi gecikmiş qərardır”

“Azərbaycanın Türkiyə vətəndaşları üçün viza rejimini ləğv etməsi xeyli yubanmış qərardır”.

“AzPolitika.info”nun məlumatına görə, Ədalət partiyasının sədri İlyas İsmayılov Türkiyə vətəndaşları üçün viza rejiminin ləğv olunması barədə qərara münasibət bildirərkən belə deyib. O, ovqat.com saytına açıqlamasında bu barədə danışıb.

Türkiyə ilə viza rejiminin, nəhayət, ləğvi barədə qərarı dünən Azərbaycan Xarici İşlər Nazirliyi açıqlayıb. Qərara görə bundan sonra Azərbaycana 30 günlük gələn Türkiyə vətəndaşları üçün viza tələb olunmayacaq.

İ.İsmayılov “gecikmiş” adlandırdığı bu qərarın Rusiyanın Türkiyə üçün viza rejimini asanlaşdırmasından sonraya təsadüf etməsinə diqqəti çəkib: “Təsəvvür edin, indiyədək Belarusa, Rusiyaya, İrana, adı dilimizə belə yatmayan Monteneqro, Bosniya və Herseqovina kimi cirtdan dövlətlərə tətbiq etdiyimiz sadələşdirilmiş viza rejimi can bir qardaşlarımıza çox görülmüşdü. Hətta hakimiyyətin dünənki qərarından sonra belə, varlığı ilə yoxluğu sezilməyən həmin dövlətçiklərin vətəndaşları Azərbaycanda türkiyəli qardaşlarımızdan daha geniş səyahət, qalmaq, gəzmək haqqına malikdirlər. Bir monteneqrolu Azərbaycanda 90 gün, bir türkiyəli isə 1 ay vizasız qala bilər. Halbuki, başımız dərdə düşəndə gözümüzün ilk zilləndiyi ölkə Türkiyə olur. Hətta bu vaxta qədər Türkiyənin yaşıl pasportluları ortaq düşmənimiz olan Ermənistanda 120 gün qala bilərdilər. Biz isə onlara bu haqqı da tanımamışdıq. Di gəl ki, beynəlxalq təzyiqləri yumşaltmaq üçün siyasi manevrlər etməyə məcbur olan Türkiyə Ermənistanla sərhədləri açacağını bildirən kimi Ankaraya elçilər göndərib səsini başına atanlar da bunlardır”.

İ.İsmayılov belə hesab edir ki, Türkiyə ilə viza rejiminin indiyədək ləğv olunmaması Rusiyanın mövqeyilə bağlı olub: “Türkiyəyə Rusiya razı olmadığı üçün eyni imtiyazı verə bilmirdilər. İndisə Rusiya Türkiyə vətəndaşları üçün viza rejimində müəyyən güzəştə gedən kimi, bizimkilər də onu təqlid etməyə başlayıblar”.

V.Nəsibov