“ŞƏXSƏN TANIDIĞIM ŞƏRƏFİ OLMAYAN İNSANLAR MƏNİ TƏNQİD ETDİ…” – Deputat hələ də Moskvaya xidmət arzusundadır+ VİDEO  

Dərc olunub: 30/09/2019 - 21:23

f93ec365-c7c9-4407-8f36-1111d2e46643Deputat  hələ də Moskvaya xidmət arzusu ilə yaşayırmış:   Kommunist Partiyasının biletini hələ də saxlayıram. Cəlil Məmmədquluzadə demiş, bəlkə də, qaytardılar”

Son günlər ətrafında müxtəlif qalmaqallar yaranmış deputat Rəfail Cəbrayılov mətbuat konfransı keçirib.

 “AzPolitika.info” məlumat verir ki, özünə yaxın bir qrup jurnalisti toplayıb açıqlama verən deputat mətbuat konfransında özü ilə bağlı yayılan məlumatlar haqda danışıb.

R.Cəbrayılov əvvəlcə “200-dən çox evim var” sözünə aydınlıq gətirib. O bildirib ki, borclu olduğu şəxsə (R.Cəbrayılov konkretləşdirməyib: Fətəliyeva Təranə Rasim qızına olan 300 min dollar borcu nəzərdə tutur, yoxsa Xatirə Nəcəfovaya 300 min dollar borcu) mənzil təklif edib.

Qarşı tərəf etiraz etdikdə isə bildirib ki, orda 200-dən çox mənzil tikilib, mən təmin edərəm, ev satılsın, pul verilsin:“Əfsuslar olsun ki, o məsələ bugünə qədər tam həllini tapmayıb. Belə bir məsələyə görə mənimlə bağlı məhkəməyə müraciət etdilər”.

R.Cəbrayılov məhkəməyə müraciət olunmasını dramatikləşdirməyə ehtiyac olmadığını deyib və bildirib ki, əksinə, məhkəmə prosesinə sevinir: “Çünki ölkə Prezidentinin siyasəti nəticəsində hüquqi dövlət yaranıb və nəinki deputatı, naziri, hər kəsi məhkəməyə vermək olar. Bunun nəyi pisdir ki?”

R.Cəbrayılov həmin şəxsi evinə dəvət etməsi və problemin həllinə çalışmasından peşman olmadığını bildirib:“Həyatım geriyə fırlansaydı, mən yenə bu cür hərəkət edərdim”.

R.Cəbrayılov deyib ki, borc məsələsi müzakirəyə çıxarıldığına görə deputat kimi fəaliyyət göstərmək istəməyib: “Məsələ qardaşım Elşən Cəbrayılova məxsus tikinti şirkəti ilə bağlı idi. Devalvasiyadan sonra vətəndaş Təranə Fətəliyeva ilə qardaşım arasında narazılıq yarandı. Ümumiyyətlə, mənə dedilər ki, bəlkə, istefa verməyə tələsməyəsən, amma mən belə daha düzgün hesab etdim. Bu, Azərbaycanda nadir hadisələrdəndir. Yeni Azərbaycan Partiyasının üzvü deyiləm, ona görə bunu dramatikləşdirməyə ehtiyac yoxdur”.

R.Cəbrayılov ölkəni tərk etməyəcəyini deyib. İqtidara sədaqətli olduğunu iddia edib.

O, borc məsələsinin tez bir zamanda həll ediləcəyini də  qeyd edib.

R.Cəbrayılov Heydər Əliyev siyasi kursuna sadiq qaldığını vurğulayıb: “Hazırda İlham Əliyevin siyasi kursuna sədaqətlə xidmət edirəm. Bundan sonra da belə olacaq. Mən tez-tez əqidəsini dəyişən adam deyiləm. Kommunist Partiyasının biletini hələ də saxlayıram. Cəlil Məmmədquluzadə demiş, bəlkə də, qaytardılar”.

Qeyd edək ki,  Rəfael Cəbrayılovun bu açıqlaması həm onun siyasi baxımdan nə qədər savadsız olduğunu, həm də hələ də Moskvaya xidmət arzusu ilə ” alışıb-yandığını” düşünməyə asas verir. Adamın sözlərində belə anlaşlır ki,  yenidən SSRİ-nin bərpasına ümid etdiyi üçün  partiya biletini saxlayıb!.  

İndi sual olunur, belə düşüncəli birinə kim mandat verib, SSRİ arzusu ilə yaşayan bu adam necə müstəqil Azərbaycanın Milli Məclisinə düşüb?  

 “AzPolitika.info” deputatın mətbuat konfransını təqdim edir:

Xatırladaq ki,  Rəfail Cəbrayılovun öz deputat mandatını girov qoyaraq, kredit götürməsi ilə bağlı məlumatlar yayılıb. Buna görə, R.Cəbrayılov özü Milli Məclisə ünvanladığı müraciətlə deputat mandatından imtina edib.

AzPolitika.info






loading...


Fikrinizi bildirin