“Hər kəs ayağını bir addım geri çəkməlidir...” – İqtidar və müxalifətə çağırış

“Unutmayaq ki, xırda bir təxribat böyüyüb elə fəlakət yarada bilər ki, Azərbaycan adlı məmləkəti yalnız xəyallarımızda yaşada bilərik”.

“AzPolitika.info”nun məlumatına görə, belə bir xəbərdarlıqla sabiq deputat, Müdafiə Nazirliyi mətbuat xidmətinin keçmiş rəisi Eldar Sabiroğlu çıxış edib.

O, Azərbaycanda sabitliyi, ümumilikdə ölkənin taleyini təhlükə altına atmamaq üçün hamını təmkinə səsləyib: “Bir-birimizi təqib etməkdən, bir-birimizi sancmaqdan əlimizi götürüb, hər hansı təxribata imkan verməməliyik. İddiaları kənara qoyub, iqtidarlı-müxalifətli, hər kəs bir addım ayaqlarını geri qoymalıdır. Bunu bizdən xalqın taleyi tələb edir”.

E.Sabiroğlu əlavə edib ki, oğlu Rüfət Səfərova qarşı hakimiyyətin sərt davranmasına baxmayaraq, özünü qisasçı ovqata kökləmir. “Özümü qisasçı ovqata kökləmir və nəyinsə acığına ölkədə idarəolunmayan vəziyyətin baş verməsini səbirsizliklə gözləmirəm. İctimai-siyasi proseslərin təhlükəli həddə dayandığını bir anlığa təsəvvürə gətirdikdə, bütövlükdə Vətənin düşündüyümüzdən də ağır faciələrlə üzləşəcəyini görürəm”.

“AzPolitika”