Məhəmməd Hadinin 140 illiyi qeyd ediləcək
Prezident İlham Əliyev "Məhəmməd Hadinin 140 illiyinin qeyd edilməsi haqqında" sərəncam imzalayıb. Sərəncamda deyilir:
"2019-cu ildə Azərbaycan ədəbiyyatının görkəmli nümayəndəsi, mütəfəkkir şair və publisist Məhəmməd Hadinin (Ağaməhəmməd Hacı Əbdülsəlim oğlunun) anadan olmasının 140 illiyi tamam olur.
Məhəmməd Hadi XX əsr Azərbaycan poeziyasında romantizmin ədəbi cərəyan kimi təşəkkülü və inkişafında mühüm xidmətlər göstərmişdir. Şərq bədii-estetik fikir tarixinin dərin bilicisi olan bu qüdrətli qələm sahibi bütün istedadını doğma vətəninin mədəni tərəqqisi uğrunda mübarizəyə həsr etmişdir. Şairin dövrün mürəkkəb sosial-siyasi mənzərəsini dolğun əks etdirən, ictimai həyat hadisələrini fəlsəfi mövqedən işıqlandıran və eyni zamanda, özünün bənzərsiz sənətkarlıq xüsusiyyətləri ilə seçilən, maarifçilik ideyaları ilə zəngin əsərlərində elmin və mədəniyyətin təbliği başlıca yer tuturdu. Xalqları oyanışa və istiqlaliyyət uğrunda mübarizəyə səsləyən Məhəmməd Hadi azadlığı cəmiyyətin və şəxsiyyətin həyatının mənası sayaraq onu daim romantik vüsətlə tərənnüm etmişdir".
Sərəncamla Azərbaycan Milli Elmlər Akademiyası, Azərbaycan Yazıçılar Birliyinin təkliflərini nəzərə almaqla, mütəfəkkir şair Məhəmməd Hadinin 140 illiyinə həsr olunmuş tədbirlər planını hazırlayıb həyata keçirmək, Nazirlər Kabinetinə bu sərəncamdan irəli gələn məsələləri həll etmək tapşırılıb.
Şərhlər
Böyük Azərbaycan Türk şairi,mükafatlara baş əyib buyruqlar yerinə yetirməyən,ömrü boyu türkçülüyün tərənnümçüsü olan,torpaqlarımızın işğalı ilə məşğul olan vəhşi çar Rusiyasının fitnə-fəsadları ilə satqın ermənilərin əli ilə qətlə yetirilən,Cavad xanın məzarını göz bəbəyi kimi qoruyan Rusiya tərəıfindən məzarı ilə birlikdə Gəncədə "yoxa" çıxan MƏHƏMMƏD HADİ doğum günün mübarək!Abbas Səhətin Ələkbər Sabir haqqıənda söylədiyi kimi,"heykəl yapılacaq namına"!Adına heykəl yapmağın zamanı gəldi!Bu mübarək fərmana görə cənab Prezident sağ olsun!