Azərbaycanda pensiyaçıların sayı açıqlanıb
2020-ci ilin əvvəlinə ölkədə ilkin məlumatlara görə pensiyaçıların sayı 1277,8 min nəfər olmaqla ölkə əhalisinin 12,8 faizini təşkil edib.
Dövlət Statistika Komitəsindən "Report"a verilən məlumata görə, ölkədə pensiyaçıların sosial müdafiəsini gücləndirmək məqsədilə Azərbaycan Respublikası Prezidentinin 2019-cu il 7 fevral tarixli 933 nömrəli Sərəncamına əsasən 2018-ci il üzrə orta aylıq nominal əməkhaqqının illik artım tempinə uyğun olaraq 2019-cu ilin 1 yanvar tarixinə bütün növ əmək pensiyalarının sığorta hissəsi indeksləşdirilərək artırılıb.
“Əmək pensiyaları haqqında” Azərbaycan Respublikasının Qanununda edilmiş müvafiq dəyişikliklərə əsasən əmək pensiyasının minimum məbləği 2019-cu il 1 mart tarixindən 160 manat, 2019-cu il 1 oktyabr tarixindən isə 200 manat müəyyən olunub ki, bu da müəyyən edilmiş minimum aylıq əməkhaqqının 80 faizini təşkil edir.
Beynəlxalq Valyuta Fondunun məlumatları əsasında aparılmış hesablamalara görə ölkədə minimum pensiyanın alıcılıq qabiliyyəti pariteti üzrə beynəlxalq dollarla qiymətləndirilmiş məbləği MDB məkanında ən yüksək göstəricidir.
İlkin məlumatlara əsasən 2020-ci ilin əvvəlinə 400,4 min nəfər sosial müavinət, 295,7 min nəfər Azərbaycan Respublikası Prezidentinin təqaüdünü almışdır. 2019-cu il ərzində birdəfəlik müavinət alanların sayı 89,3 min nəfər oub.
“Sosial müavinətlərin məbləğinin artırılması haqqında” Azərbaycan Respublikası Prezidentinin 2013-cü il 29 avqust tarixli 973 nömrəli Fərmanında dəyişiklik edilməsi barədə” Azərbaycan Respublikası Prezidentinin 2019-cu il 15 aprel tarixli 640 nömrəli Fərmanına əsasən birdəfəlik müavinətlərin məbləği 2019-cu ilin aprelin 1-dən artırılaraq uşağın anadan olmasına görə 109 manatdan 200 manata, dəfn üçün isə 146 manatdan 300 manata çatdırılıb.
Şərhlər
Nə qədər yalan yazmaq olar.MDB məkanında pensiyaların miqdarı Azərbaycanda Rusyadan, Ermənistandan, Belorussiyadan, Ukraynadan aşağı olduğu halda belə yalan ın məqsədi aydın deyil. BUndan başqa nazir Babayev bir çıxışında minimal pensiyanın 700 min insana şamil edildiyini göstərmişdi.Bu rəqəm dı yanlışdır Çünki 1277 min nəfər pensiyaçının 700 min nəfəri minimum pensiya ala bilməz.Odur ki, bu sahə boş buraxıldığından ömrünü işləyib,dövlətə vergi ödəyən vətəndaşların 230-250 manat pensiya alması dəhşətli vəziyyətdən xəbər verir.