ABŞ-da son bir gündə COVID-19-a 24,2 min yoluxma qeydə alındı

ABŞ-da son bir gün ərzində koronavirusa 24 mindən çox yoluxma qeydə alınıb, demək olar, 1,2 min insan ölüb.

"Report" xəbər verir ki, bu barədə ABŞ-da federal və yerli hakimiyyətin məlumatları, həmçinin KİV və başqa mənbələrlə hesablamalar aparan Con Hopkins Universiteti bildirib.

Məlumata görə, ABŞ-da ötən gün ərzində virusa 24 266 yoluxma qeydə alınıb.

Son 24 saat ərzində Birləşmiş Ştatlarda 1 193 nəfər koronavirusun qurbanı olub.

Universitet bildirib ki, ABŞ-da COVID-19-a ümumilikdə 1 747 087 yoluxma təsdiqlənib, ölkədə koronavirusdan 102 836 ölüm qeydə alınıb.

Qeyd edilir ki, virusa yoluxmuş 400 mindən çox insan sağalıb.

Koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus 213 ölkə və bölgədə qeydə alınıb.