2015-ci ilin büdcə müzakirələri başa çatdı

Milli Məclisin plenar iclasında 2015-ci ilin büdcə zərfinə daxil olan qanun layihələri müzakirə edilib.

Qanun layihələrinin müzakirəsi başa çatıb.

“APA-Economics”in məlumatına görə, Milli Məclisin plenar iclasında Milli Məclisin aparatının saxlanması üçün 2015-ci ilin xərclər smetası layihəsi barədə Milli Məclisin işlər idarəsinin müdiri Firudin Hacıyev məlumat verib. O, bildirib ki, Milli Məclis və onun aparatının saxlanması ilə bağlı 2015-ci ilin xərclər smetası layihəsinin qanunvericilikdə nəzərdə tutulmuş şəkildə hazırlanıb və xərclər smetası, ştat cədvəlləri, inzibatı binaların, mühəndis qurğularına xidmət göstərən təşkilatlarla bağlanan müqavilələr və proqnozlar əsasında tərtib edilib. Xərclər smetasının ümumi dəyərinin 69,7%-ni əmək haqqı fondu və əmək haqqına olan əlavələr təşkil edir.

Daha sonra Hesablama Palatasının sədri Vüqar Gülməmmədov çıxış edib. V. Gülməmmədov bildirib ki, 2015-ci ilin dövlət büdcəsindən Hesablama Palatasının xərclər smetası üçün, ümumilikdə 3,892 mln. manat vəsait ayrılıb, bu 2014-cü ilin proqnozundan 258 min manat çoxdur.

Deputatların irəli sürdüyü təkliflərin nəzərə alınması üçün hökumətə bu ayın 28-nə kimi vaxt verilib. Onu da qeyd edə ki, 8 gün sonra Milli Məclisdə 2015-ci ilin dövlət büdcə zərfinə daxil olan qanun layihələrinin təsdiq olunması gözlənilir.