Cənnət yuxusu
Bu yazı Xocalı və Şuşada şəhid olan vətən ovladlarının bir anlıq da olsun bizi rahat buraxmayan ölməz ruhlarına ithaf olunur.
Dünən gördüyüm yuxuydu, nə idi bilməm,
Gördüm,
heç vaxt görmədiyim
cənnət qoxulu bir yerdəyəm.
Buranın bir tərəfi,
içi qanla dolu
qar üstündə donmuş körpələrin
izi qalan Xocalıya,
Bir tərəfi şiş qayalı,
cıdırları bədöy atsız
Şuşaya bənzəyirdi.
Bənzəyirdi,
bəzəklərindən tanıdığım xınalı kəkliklər,
Bənzəyirdi,
xəcalətdən boyu qısılan əlçatmaz yüksəkliklər.
Xonça bəzədilmişdi burda qar üstdə qızılı qandan,
Hər şəhid bir pay tutmuşdu sanki
Allaha şirin candan.
Göylər elə aydın, yerlər elə gözəldi,
Deyərdin bəs,
ölmüşlərin cənnət yeridir burası.
Cənnət dedim,
cənnət belə olurmuş?!
Allahım,
bu nə cənnət ki,
çəmənləri, çiçəkləri xəzan olub solurmuş?!
Kərpicləri dəlik-dəlik minarədən
qaibanə azan səsi yüksəlirdi,
Bədənləri kurşunlara hədəf olan insanların
ruhu burda haray çəkir, inləyirdi.
İnləyirdi burda can bədənə,
bədən cana həsrət qalan
ana ruhlar, bala ruhlar,
Tikdirmiş sahibsiz qalan yurd içində ruhdan özünə
qala ruhlar.
Quşlar elə qəm nəğməsin oxuyurdu,
Barmaqları xınalı gəlinlər
ilməsi göz yaşından, naxışları kədərdən,
Qarabağ xalçasını elə könülsüz toxuyurdu...
Xəbər yoxdu burada məmləkətin
çalçağırlı siyasət havasından,
Xəyanətə qol qoyanlar
əl çəkmək istəmir rəyasət davasından.
Bakısı hər gün toylu, büsatlı,
Şuşası yaslı şəhər.
Biri altun, şərab düşgünü,
Biri vaya durur hər açılan səhər.
Qurumuş yarpaqların
kəsilmiş əllər yerinə
dəli kimi sinə döydüyünü gördüm,
Ağılar yetmirdi dərd ovutmağa.
can fədası şəhidlərin
ağsaçlı ana dilindən öyündüyünü gördüm.
Gördüm,
dillər yox, gözü yol çəkən gözlər danışır,
Gördüm,
səssizlik içində sözlər özü dilə gəlib,
qərib sözlər danışır.
“Qulaq səs çəkər”- söz misalıdır.
Gəlmirdi buralardan qulaq çəkən
Xanın səsi,
Ucalmırdı daha Qarabağın
ruha qida verən şikəstəsi.
Cinsi dəyişilmiş itlər hürər buralarda,
bizə nə!
Yellər əsib, dərələrə uca dağlardan qarın kürər,
bizə nə!
Bizə nə fərqi varmış
qüzeylərində qarlarımızı qurd basdığının,
Biz çoxdan unutmuşuq qarı düşmənin yağmalayıb
üstümüzdən yurd basdığını.
Nə saz ovudar qardaşım, nə söz bizi,
Nə kimsə qəhrin çəkməz vətənsizin.
Hər şey vardı,
heç nə yoxdur buralarda könül açan,
Bir də nə vaxt geri dönər
düzlərindən ceyran-cüyür, maral qaçan.
Hanı xoş üzlülər, hanı badamı gözlər,
Gözlər,
gözü yol çəkən hər kəs burda öz adamını gözlər.
Çeşməsində sular gördüm qan qarışan,
Hanı burda ulduzları göylərində
bir zamanlar şəfəq saçan, sayrışan.
Hanı buranın içi dolu adamı,
Getdimi doğmalar,
qaldı bu torpaqlar yoxsa yadamı?
Yurddusa yurddaşları hara getmiş,
Fərqi nəymiş,
yurdu yurdsuz qoyan millət
cəhənnəmə ya gora getmiş.
Cəhənnəm örtər ayıbını cənnət qədrin bilməyəni,
Sevməz kimsə özgəsi öz vətənin sevməyəni!
Şərhlər
Hər hansısa bir şərh yazılmayıb.