Bakıda "Qiymət artımına son" aksiyası - VİDEO, FOTOLAR

Fevralın 28-də Bakının mərkəzində, Fəvvarələr meydanında ölkədə manatın ucuzlaşmasından sonra yaranmış süni qiymət artımına qarşı etiraz aksiyası keçirildi.

Aksiyanın başlamasına saatlar qalmış, əraziyə yetərincə polis qüvvəsi yeridilmişdi. Mülki geyimdə olan polis əməkdaşları, ərazidə sadə vətəndaşlar kimi dolaşır, ətrafa nəzarət edirdilər.

Aksiya öncədən planlaşdırılmışdı. "Facebook" sosial şəbəkəsində yaradılan dəvətdə, aksiyanın yeri və saatı bəlirlənmişdi: "Bəylər və xanımlar. Bu günlərdə baş verən bahalaşmaya və manatın kəskin ucuzlaşmasına etiraz olaraq bütün bunların səbəbkarı hakimiyyətə qarşı etiraz səsinizi ucaltmaq üçün hər birinizi meydana dəvət edirəm. Aksiya fevralın 28-də, saat 15:00-da fəvvarələr meydanında baş tutacaq".

Həqiqətən də elə oldu. Saat 15:00 radələrində artıq müəyyən kütlə fəvvarələr meydanına toplanmışdı. Jurnalistləri görən 76 yaşlı Safura Nağıyeva adlı yaşlı qadın, öz şikayətini səsləndirməyə başladı: "Yaşlı qadınam. Aylıq təqaüdüm mənə 15 gün belə bəs etmir. İşləyə də bilmirəm. Çünki işə götürmürlər. Deyirlər ki, yaşlıyam. Bəs mən nə edim? Hər şey yuxarıda oturanlar üçündür? Onlar tox olsun, camaat ac? Daha bezmişəm. Yaşamaq istəmirəm".

Yaşlı qadına ətrafda olan camaat da dəstək verdi. Onlar da mövcud vəziyyətdən, manatın ucuzlaşmasından, qiymət artımından şikayətlənməyə başladılar. Kütlənin getdikcə çoxaldığını görən polis əməkdaşları, yaşlı qadını qolundan tutaraq, polislərdən ibarət canlı səddin digər hissəsinə apardılar. Oradan isə ərazi üzrə polis bölməsinə...

Getdikcə saxlanılanların sayı artmağa başladı. Ərazidəki polis alayı, ümumi olaraq 10 nəfəri saxlayaraq, polis bölməsinə apardı. Saxlanılanlar arasında ana və qızı olmaqla daha iki xanım var idi.

Aksiya iştirakçılarını saxlayanlar əsasən yenə də mülki geyimlilər idi. Onların fəaliyyəti daha çox görünürdü.

Saxlanılan gənclərdən birinin kimliyini öyrənə bildik. O, Vətəndaş Həmrəyliyi Partiyasının üzvü İnqilab Nəsirovdur. Aldığımız məlumata görə, saxlanılanlar Nəsimi rayon Polis İdarəsinin 22-ci polis bölməsinə aparılıblar.

Bir müddət sonra polis aksiya iştirakçılarını ərazidən uzaqlaşdıraraq, aksiyanın böyüməsinin qarşısını aldı. Ümumilikdə isə aksiyaya 150-ə yaxın insan qatılıb. (musavat.com)

Böyütmək üçün şəkillərə klikləyin

[gallery columns="7" ids="98656,98657,98658,98659,98660,98661,98662,98663,98664,98665,98666,98667,98668,98669,98670,98671,98672,98673,98674,98675,98676,98677,98678,98679,98680,98681,98682,98683"]