Ukraynanın Fövqəladə Hallar Dövlət Xidmətinin məlumatına görə, dekabrın 24-nə keçən gecə Zaporojye şəhərində rus hərbi qüvvələrinin həyata keçirdiyi avia hücum nəticəsində ən azı 4 nəfər yaralanıb.
Şəhər administrasiyasının rəhbəri İvan Fedorov bildirib ki, rus qüvvələri ən azı 3 avia zərbə endirib. Nəticədə 13-dən çox yaşayış binası zədələnib, bir yaşayış məhəlləsində isə yanğın baş verib. Fedorov qeyd edib ki, zərbə zamanı ciddi maddi ziyan dəyib və vətəndaşlar böyük qorxu içində qalıblar.
Ukrayna Silahlı Qüvvələri bildirir ki, gecə ərzində Rusiyanın hücumları çərçivəsində ölkə ərazisinə 116 pilotsuz uçan aparat atılıb. Xüsusilə Çerniqov vilayətində əhəmiyyətli infrastruktur obyektləri hədəfə alınıb. Saat 08:30-a olan məlumata görə, Ukrayna Hava Hücumundan Müdafiə qüvvələri 60 PUA-ni vuraraq məhv edib. Ukrayna hakimiyyəti və beynəlxalq təşkilatlar bu hücumları vətəndaş obyektlərinə və dinc sakinlərə qarşı hərbi cinayətlər kimi qiymətləndirir. Rusiya isə iddia edir ki, hücumlar yalnız hərbi obyektləri hədəf alıb. Ekspertlər bildirirlər ki, bu hücumlar Ukraynada humanitar vəziyyətin pisləşməsinə, yaşayış məntəqələrində qorxu və maddi ziyana səbəb olur.
“AzPolitika.info”
Şərhlər