İranda 28 dekabr 2025-ci ildə başlayan etiraz aksiyaları 19-cu günündə də davam edir. Aksiyalar zamanı həlak olanların sayı 2 mini keçib. Bu fonda İsrailin Baş naziri Benyamin Netanyahunun ABŞ Prezidenti Donald Trampdan İrana qarşı mümkün hərbi zərbə planlarını təxirə salmağı xahiş etdiyi iddia olunur.
“The New York Times” qəzetinin yazdığına görə, ABŞ-nin İrana mümkün hücum planları region ölkələrində ciddi narahatlıq doğurub. ABŞ hökumətindəki mənbələr Netanyahunun yanvarın 14-də Tramp ilə telefon danışığı apardığını və bu söhbət zamanı İrana qarşı hərbi planların təxirə salınmasını istədiyini açıqlayıb.
Məlumata görə, Netanyahu yanvarın 13-də ABŞ vitse-prezidenti Cey Di Venslə də görüşüb. Həmin gün Trampın yüksək vəzifəli müşavirləri Ağ Evdə toplaşaraq İrana qarşı mümkün hərbi variantları müzakirə ediblər.
Körfəz ölkələrindən bir rəsmi isə bildirib ki, Qətər, Səudiyyə Ərəbistanı, Oman və Misir də İrana qarşı mümkün hücumun genişmiqyaslı regional münaqişəyə çevrilə biləcəyindən narahatdır. Bu səbəbdən sözügedən ölkələr son günlər Vaşinqtondan oxşar tələblərlə çıxış ediblər.
Həmin mənbənin sözlərinə görə, bu ərəb ölkələri eyni zamanda Tehranla da əlaqə saxlayaraq, hücuma məruz qalacaqları təqdirdə regiondakı digər ölkələri hədəf almamaq barədə xəbərdarlıq ediblər.
"AzPolitika.info"
Şərhlər