İranın BMT-dəki daimi nümayəndəsi Əmir-Səid İrəvani İsrail müdafiə naziri İsrael Katzın İranın ali lideri Müctəba Xamenei ilə bağlı fikirlərinə görə BMT-nin baş katibinə etiraz məktubu göndərib.

"Azpolitika" xəbər verir ki, İrəvani İsrail müdafiə nazirinin təhdidini İran hökumət rəsmilərinə qarşı yönəlmiş dövlət terrorizminin qəsdən və sistemli siyasətinin bir hissəsi adlandırıb.

O, İsrail rejiminin ABŞ-ın iştirakı, koordinasiyası və dəstəyi ilə İran lideri Ayətullah Əli Xamenei və digər yüksək vəzifəli siyasi və hərbi rəsmilərin öldürülməsi də daxil olmaqla, İrana qarşı qanunsuz təcavüz aktları törətdiyini bildirib.

İrəvani əlavə edib ki, BMT Təhlükəsizlik Şurası İsrailin cəzasız hərəkətlərinə icazə verib. İran rəsmisi xəbərdarlıq edib ki, Tehran istənilən düşmənçilik hərəkətinə cavab verəcək.

"Təəssüf ki, Təhlükəsizlik Şurasının BMT Nizamnaməsi çərçivəsində öz vəzifələrini yerinə yetirməməsi cəzasızlıq mühitini gücləndirib və İsrail rejimini dövlət terrorizmini normallaşdırmaqda daha həyasız edib ki, bu da çox təhlükəli bir nümunə yaradır və beynəlxalq sülh və təhlükəsizliyə ciddi təhdid yaradır", - deyə o qeyd edib.