ABŞ və Oman İranı Hörmüz boğazından gəmilərin keçidi üçün ödəniş almaqdan imtina etməyə inandırmağın yollarını axtarır.

"Report" xəbər verir ki, bu barədə "The Wall Street Journal" (WSJ) mənbələrə istinadən yazıb.

Nəşrin məlumatına görə, dolayı danışıqlar zamanı Vaşinqton xaricdə dondurulmuş 100 milyard dollar dəyərindəki İran aktivlərinin sərbəst buraxılması müqabilində Tehrana Hörmüz boğazından keçid üçün ödənişin tətbiq edilməsindən və marşrut üzərindəki nəzarətdən imtinanı təklif edib.

Qəzetin məlumatına görə, ABŞ-nin xüsusi elçiləri Stiv Uitkoff və Cared Kuşner bu həftə Dohada qətərli vasitəçilərlə vəziyyətdən çıxış yollarını və boğazın açılması ilə bağlı ötən ay əldə olunmuş ilkin razılaşmanın icrasını müzakirə ediblər.

Eyni zamanda, WSJ mənbələrinin sözlərinə görə, həm Amerika, həm də İran nümayəndə heyətləri Qətərdə vəziyyəti mürəkkəbləşdirən Livandakı son döyüş əməliyyatlarını müzakirə ediblər.

Nəşrin məlumatına görə, İran göstərilən xidmətlər müqabilində boğazdan keçən hər bir gəmidən ödəniş almaq istəyir, lakin bunun əvəzinə danışıqlar aparan tərəflər boğazın cənub hissəsinə hüquqları olan Omanın alternativ təklifini nəzərdən keçirirlər ki, buna əsasən, dəniz xidmətlərinin haqqı könüllü ayırmalarla maliyyələşdirilən fond vasitəsilə ödəniləcək.