ABŞ Silahlı Qüvvələrinin Mərkəzi Komandanlığının (CENTCOM) rəhbəri admiral Bred Kuper Pentaqona və Ağ Evə Hörmüz boğazı bölgəsində İrana qarşı zərbələr kampaniyasını başa çatdırmağı tövsiyə edib, çünki onun effektivliyi tükənib.

"Report" xəbər verir ki, bu barədə "Axios" portalının jurnalisti Barak Ravid amerikalı hərbi rəhbərin mövqeyi ilə tanış olan iki mənbəyə istinadən məlumat yayıb.

Onların sözlərinə görə, Kuperin tövsiyəsi, eləcə də digər müşavirlərin hərbi əməliyyatın məhdud imkanları barədə fikirləri ABŞ Prezidenti Donald Trampın İrana zərbələri dayandırmaq qərarına təsir göstərib.

Ötən gün D. Tramp hərbçilərə atəşi dayandırmağı, ölkənin cənub sahilində və Hörmüz boğazı bölgəsindəki İran obyektlərinə hücum etməməyi əmr edib. Qərar yüksəkrütbəli müşavirlər və hərbçilərlə müşavirədən sonra qəbul edilib.

Mənbələr qeyd ediblər ki, görüşdən əvvəlki günlərdə Prezident İrana qarşı irimiqyaslı hərbi əməliyyatın bərpasına meylli olub, lakin sonradan onun mövqeyi dəyişməyə başlayıb.

Kuper əvvəllər Pentaqona, Qərargah Rəisləri Komitəsinin sədrinə və Ağ Evə bildirib ki, iki həftəlik zərbələr İranın gəmilərə hücum etmək qabiliyyətini əhəmiyyətli dərəcədə zəiflədib. Hörmüz boğazı bölgəsindəki kampaniya çərçivəsində müəyyən edilmiş hədəflərin əksəriyyəti artıq vurulub.

Admiralın sözlərinə görə, növbəti mümkün addım ABŞ hərbçilərinin seçdiyi, lakin "Epik Qəzəb" əməliyyatı zamanı hücum etmədiyi hədəflərin təxminən 20%-ni məhv etmək üçün irimiqyaslı əməliyyatın bərpası ola bilərdi. Bununla belə, Kuper vurğulayıb ki, gələcək eskalasiyaya yol verməmək qərarı qəbul edilibsə, zərbələrin davam etdirilməsinin heç bir mənası yoxdur.

Qərargah Rəisləri Komitəsinin sədri general Den Keyn həmçinin müdafiə naziri Pit Heqseti və Trampı HHM sistemləri üçün ələkeçirici raketlərin mümkün çatışmazlığı barədə xəbərdar edib. Onun qiymətləndirməsinə görə, bu, regiondakı Amerika qüvvələrinin və müttəfiqlərinin müdafiəsini çətinləşdirə bilər.

ABŞ-nin BMT-dəki daimi nümayəndəsi Mayk Uolts "NBC"-yə müsahibəsində bildirib ki, Tramp bütün fəaliyyət variantlarını saxlayır və eyni zamanda İranla danışıqlar üçün məkan yaradır. Onun sözlərinə görə, Vaşinqton və Tehran arasında əlaqələr bütün səviyyələrdə davam edir.